Ku na ni vanhu va timbilu ti nene tixakeni tontlhe ta wukhongeli. Mahungu yo saseka a ku tiva lezaku Nungungulu wa va wona a vanhu lavo a tlhela a va khatalela. Kanilezi, lexi xi nga tsakisiko hi lezaku a wukhongeli gi tala ku tiriselwa zilo zo biha. (2 Va Le Korinte 4:3, 4; 11:13-15) Hi kuya hi zihaxa-mahungu, a tixaka to kari ta wukhongeli ta tlhela ti hlengela ka terrorismo, kuhihiritwa ka vanhu, tiyimpi, ni kuxakelwa ka zivanana. Lezo a zo ku va bayisa lava va kholwako hi mbilu yontlhe ka Nungungulu! — Gonza Mateu 24:3-5, 11, 12.

A wukhongeli ga lisine ga dumisa Nungungulu, kuveni a wukhongeli ga mawunwa go mu khunguvanyisa. Gi gonzisa zilo zi kalako zi nga hi kona lomu ka Biblia, a ku patsa ni tigonzo ta mawunwa xungetano hi Nungungulu ni vafileko. Kanilezi Jehova i lava lezaku a vanhu va tiva a lisine xungetano hi yena. — Gonza Ezekieli 18:4; 1 Timote 2:3-5.

Lexi xi tsakisako hi lezaku Nungungulu a nga kanganyiswi hi wukhongeli legi gi wulako lezaku ga mu ranza kuveni hi lisine gi ranza a tiko ga Satani. (Jakobe 4:4) A Mhaka ya Nungungulu yi ngalo a wukhongeli gontlhe ga mawunwa i “Babuloni wa hombe.” Babuloni gi wa hi doropa ga kale lomu gi nga sangulela kona a wukhongeli ga mawunwa anzhako ka Ntalo wa masikwini ya Noa. Lokuloku, Nungungulu i ta fuvisa hi xitshuketi a wukhongeli legi gi kanganyisako gi tlhela gi xanisa vanhu. — Gonza Kuvululelwa 17:1, 2, 5, 16, 17; 18:8.

Ka ha hi ni manwani mahungu yo saseka. Jehova a nga rivalangi a vanhu vo tsumbeka lava va hangalakileko wukhongelini  ga mawunwa misaveni yontlhe. Yena wa tlhanganyisa vanhu lavo hi ku va gonzisa a zinene. — Gonza Mika 4:2, 5.

Jehova wa khatalela a vanhu lava va ranzako lisine ni za zi nene. I va kuca a ku huma wukhongelini ga mawunwa. A vanhu lava va ranzako Nungungulu va ti yimisele ku maha lezi zi lavekako kasi ku mu tsakisa. — Gonza Kuvululelwa 18:4.

Ka zana ga malembe go sangula, a xikhati lexi a vanhu va timbilu ti nene va ngazwa a mahungu yo saseka hi ka vapostoli, vona va lo ma amukela hi kutsaka. Va lo gonza a mahanyela maswa ka Jehova, lawa ma tsakisako, na ma hi ni kungo ni wumanziko. Vona xikombiso xi nene ka hina inyamutlha hakuva va vumelile a mahungu yo saseka hi ku rangisa Jehova wutomini gabye. — Gonza 1 Va Le Tesalonika 1:8, 9; 2:13.

Jehova wa amukela lava va humako wukhongelini ga mawunwa lezaku va maha xipanze xa ngango wakwe wa vakhozeli. Loku u vumela a xirambo xa Jehova xa liranzo, u tava munghana wakwe, u kuma ngango wuswa wa liranzo wa vakhozeli-kuloni va Jehova, ni wutomi ga pinzukelwa. — Gonza Marku 10:29, 30; 2 Va Le Korinte 6:17, 18.

A kulamulwa ka wukhongeli ga mawunwa loku ku tako konawu mahungu yo saseka. Ku ta mbheta kuxaniseka misaveni yontlhe. A wukhongeli ga mawunwa gi nga ta tshuka gi kanganyisa ni ku ava vanhu kambe. Vontlhe lava va to ngha va hanya va ta tlhanganyiswa wukhozelini ga Nungungulu munwe wa lisine. — Gonza Kuvululelwa 18:20, 21; 21:3, 4.