Handle ko kanakana, a kambisiso lowu hi wu mahileko wa tigonzo ta Biblia ta xiseketelo wu tiyisile a liranzo la wena hi Jehova. A liranzo lelo li lava ku tshama hi ku hlakulelwa. (1 Pedro 2:2) A kutsumba ka wena ka wutomi ga pinzukelwa ku khegela ka kusimama ka wena a ku tshinela ka Nungungulu hi ku gonza a Mhaka yakwe. — Gonza Johani 17:3; Juda 21.

A xikhati lexi u yako u kula hi wutivi ga Nungungulu, a kukholwa ka wena ku taya ku tiya nguvu. A kukholwa ku ta ku vuna ku tsakisa Nungungulu. (Maheberu 11:1, 6) Ku ta ku kuca a ku ti sola ni ku maha lezi zi lavekako kasi ku tsakisa Nungungulu. — Gonza Mitiro 3:19.

Wena hi wece u ta kuceka ku hlengela ni vanwani a zilo lezi u zi gonzako—hontlheni ha tsaka hi ku bhulela vanwani a mahungu yo saseka. Laha u yako u simama ku gonza a Biblia, u ta gonza a ndlela ya ku tirisa a Biblia kasi u tlhamusela a kukholwa ka wena hi Jehova ni mahungu yo saseka. — Gonza Va Le Roma 10:13-15.

A kutala ka vanhu va sangula hi ku hlengela mahungu yo saseka ni vanghana kutani maxaka. Ngha uva ni kuringanisela. A wutshanwini ga ku va byela lezaku a wukhongeli gabye ga hava, va byele a zitsumbiso za Nungungulu. Alakanya kambe lezaku a kutala ka zikhati a vanhu va khumbiwa hi wunene ga wena ku hunza lezi u zi wulako. — Gonza 2 Timote 2:24, 25.

A ku gonza a Mhaka ya Nungungulu zi ta ku vuna ku kula hi tlhelo ga moya. Hi kugumesa, wa zi kota ku nghena kuzwananeni ko  hlawuleka nguvu na Jehova. Hakunene wa zi kota ku lumba yena kota xiro xa ngango wakwe. — Gonza 2 Va Le Korinte 6:18.

Wa zi kota ku kula hi tlhelo ga moya hi ku simama ku gonza a Mhaka ya Nungungulu. (Maheberu 5:13, 14) Kombela yinwe ya Timboni ta Jehova lezaku yi gonza na wena a Biblia hi ku tirisa a bhuku Zini lezi a Biblia gi hi gonzisako? A xikhati lexi u yako u gonza zo tala ka Mhaka ya Nungungulu, u taya u katekiswa nguvu. — Gonza Tisimu 1:1-3; 73:27, 28.

A mahungu yo saseka mata hi ka Jehova, a Nungungulu wo tsaka. Wa zi kota ku tshinela ka yena hi ku tshinela ka vanhu vakwe. (Maheberu 10:24, 25) Laha u simamako ku ti karatela ku tsakisa Jehova, wo hlokolokela a wutomi legi gi nga wutomi hizinene—gi nga wutomi ga pinzukelwa. Hakunene, a ku tshinela ka Nungungulu hi zona zi nga chukwana ku maha. — Gonza 1 Timote 1:11; 6:19.