XIGONZO 10
U nga gi tivisa kuyini a wukhongeli ga lisine?
1. Xana ku na ni wukhongeli ginwe ntsena ga lisine?
“Chavani a vaprofeti va mawunwa.” — MATEU 7:15.
Jesu i lo gonzisa a valanzeli vakwe a wukhongeli ginwe ntsena, ku nga wukhongeli ga lisine. Gi fana ni ndlela yi yisako wutomini ga pinzukelwa. Jesu i te ngalo: “Mbatsongwani lava va yi kumako” a ndlela leyo. (Mateu 7:14) Nungungulu i vumela ntsena a wukhozeli legi gi seketelwako Mhakeni yakwe ya lisine, a Biblia. A vakhozeli vontlhe va lisine va tlhanganyisilwe hi kukholwa kunwe. — Gonza Johani 4:23, 24; 14:6; Va Le Efesusi 4:4, 5.
Wona a vhidhyu A wukhongeli gontlhe ga amukeleka ka Nungungulu?
2. Zini lezi Jesu a zi wulileko xungetano hi maKristu ya mawunwa?
“Va wula lezaku va mu tiva Nungungulu, kanilezi va mu kaneta hi mitiro yabye.” — TITUSI 1:16.
Jesu i nyikile xitlharihiso xa lezaku a wuKristu gi wa ta chakiswa hi vaprofeti va mawunwa. Va wonekisa ku khwatsi vakhozeli va lisine. A tichechi tabye ti ti wula lezaku ta wuKristu. Kanilezi u nga pola vanhu lavo hi mitiro yabye. Hi ndlela muni? A wukhozeli legi gi pswalako maKristu ya lisine lawa ma nga ni matshamela ni mahanyela yo basa hi legi ga lisine ntsena. — Gonza Mateu 7:13-23.
3. U nga va tivisa kuyini a vakhozeli va lisine?
Va tivekiswa hi matshamela lawa ya ntlhanu:
-
A vakhozeli va lisine va kombisa xichawo hi Biblia kota Mhaka ya Nungungulu. Va ti karatela ku hanya hi milayo ya gona. Hikwalaho, a wukhongeli ga lisine ga hambana ni wukhongeli legi gi sekete- lwako ka maalakanyo ya vanhu. (Mateu 15:7-9) A vakhozeli va lisine a va xumayeli a nchumu wunwe va guma va maha wunwani. — Gonza Johani 17:17; 2 Timote 3:16, 17.
-
A valanzeli va lisine va Jesu va dzunza a vito ga Nungungulu, Jehova. Jesu i dzunzile a vito ga Nungungulu hi ku gi tivekisa. I lo vuna vanhu a ku tiva Nungungulu a tlhela a va gonzisa a ku khongela lezaku a vito ga Nungungulu gi basiswa. (Mateu 6:9) Lomu u hanyako kona, hi gihi a wukhongeli gi tivekisako a vito ga Nungungulu? — Gonza Johani 17:26; Va Le Roma 10:13, 14.
-
A maKristu ya lisine ma xumayela a Mufumo wa Nungungulu. Nungungulu i rumele Jesu lezaku a ta xumayela a mahungu yo saseka ya Mufumo. A Mufumo wa Nungungulu hi wona woce wu to mbheta a zikarato za vanhu. Jesu i simamile ku wulawula hi wona kala siku legi a ngafa. (Luka 4:43; 8:1; 23:42, 43) I te ngalo a valanzeli vakwe va wa ta wu xumayela. Loku u tshinelelwa hi munhu kasi ku wulawula hi Mufumo wa Nungungulu, xana a ngava wa wukhongeli gihi? — Gonza Mateu 24:14.
-
A valanzeli va Jesu a va mahi xipanze xa tiko legi go biha. U nga va tiva hi ku kala va nga ti ngheniseli ka wupolitika kutani kulwisaneni ka vanhu. (Johani 17:16; 18:36) Ahandle ka lezo, vona a va pimanyisi a mahanyela ya tiko ya mhango. — Gonza Jakobe 4:4.
-
A maKristu ya lisine ma ranzana nguvu. Wona ma gonzisiwa hi Mhaka ya Nungungulu a ku kombisa xichawo ka vanhu va tixaka tontlhe. Hambu lezi a wukhongeli ga mawunwa gi talako ku seketela nguvu a tiyimpi ta matiko, a vakhozeli va lisine va ala ku maha lezo. (Mika 4:1-3) A maKristu ya lisine ma tirisa a xikhati ni titshomba ta wona hi matsenya kasi ku vuna ni ku tiyisa vanwani. — Gonza Johani 13:34, 35; 1 Johani 4:20.
4. Xana wa zi kota ku pola a wukhongeli ga lisine?
Hi gihi a wukhongeli gi seketelako a tigonzo ta gona tontlhe ka Mhaka ya Nungungulu, gi dzunza a vito ga Nungungulu, gi tlhela gi huwelela a Mufumo wa Nungungulu kota wona woce wu to mbheta zikarato za vanhu? Hi gihi a wukhongeli gi kombisako liranzo gi tlhela gi potsa a tiyimpi? U zi wonisa kuyini? — Gonza 1 Johani 3:10-12.