XIGONZO 9
Xana a ngango wa wena wu nga li kumisa kuyini litsako?
1. Hikuyini a kuchada ku nga ka lisima lezaku a ngango wuva ni litsako?
A mahungu yo saseka mata hi ka Jehova, a Nungungulu wo tsaka, loyi a lavako lezaku a mingango yiva ni litsako. (1 Timote 1:11, NM) Hi yena a nga vanga wukati. A ku chada hi kuya hi nayo za lisima kasi a ngango wu tsaka hakuva zi vanga xiyimo xi nene xa ku wundla kona vanana. A maKristu ma fanele ku lanzela a milayo ya tiko xungetano hi ku tsalisa muchado. — Gonza Luka 2:1, 4, 5.
Xana Nungungulu i gi wonisa kuyini wukati? Yena i lava lezaku giva kubohana ka pinzukelwa ka wanuna ni wasati. Jehova i lava lezaku a vanuna ni vasati va tsumbeka ka vanghana vabye va wukati. (Maheberu 13:4) Yena wa venga a kutlhatlhiwa ka wukati. (Malaki 2:16) Kanilezi wa vumelela a maKristu lezaku ma tlhatlha wukati ma tlhela ma chada ni munwani munhu loku a munghana wabye wa wukati a maha wubhayi. — Gonza Mateu 19:3-6, 9.
2. Xana a nuna ni sati va fanele ku khomanisa kuyini?
Jehova i vangile a wanuna ni wasati lezaku a munwe ni munwani a tatisa lezi zi kiyelako ka munwani. (Genesisi 2:18) Kota hloko ya ngango, a nuna i fanele ku teka wutihlamuleli ga ku hlayisa a ngango wakwe hi tlhelo ga nyama ni ku wu gonzisa xungetano hi Nungungulu. I fanele ku kombisa liranzo li nga hiko lo xengetela ka sati wakwe. A vanuna ni vasati va fanele ku ranzana va tlhela va kombisana xichawo. Kota lezi a vanuna vontlhe ni vasati vontlhe va nga mbhelelangiko, za lisima a ku gonza ku tsetselelana kasi ku a ngango wuva ni litsako. — Gonza Va Le Efesusi 4:31, 32; 5:22-25, 33; 1 Pedro 3:7.
3. Xana u fanele ku tsukula wukati loku mu nga hi na litsako?
Loku mu yimisana ni zikarato wukatini ga nwina, nwina va vambiri mu fanele ku ti karatela ku khomana hi liranzo. (1 Va Le Korinte 13:4, 5) A Mhaka ya Nungungulu a yi kuci munhu lezaku a hambana ni munghana wakwe wa wukati kota ndlela ya ku lulamisa zikarato za zi tsongwani. — Gonza 1 Va Le Korinte 7:10-13.
4. Vanana, zini lezi Nungungulu a mu alakanyelako?
Jehova i lava lezaku muva ni litsako. Yena i mu nyika a wusungukati ga chukwana ka gontlhe xungetano hi lezi mu faneleko ku hanyisa zona wusweni ga nwina. I lava lezaku mu vuneka hi wutlhari ni kubuva ka vapswali va nwina. (Va Le Kolosi 3:20) Jehova i lava kambe lezaku mu kuma litsako la ku mahela zilo a Muvangi wa nwina ni N’wana wakwe. — Gonza Mutshawuteli 11:9–12:1; Mateu 19:13-15; 21:15, 16.
5. Vapswali, xana a vana va nwina va nga li kumisa kuyini litsako?
Mu fanele ku ti karatela ku lavela vana va nwina a zakuga, yindlu, ni tinguwo. (1 Timote 5:8) Kanilezi, kasi ku a vana va nwina va kuma litsako, mu fanele ku va gonzisa kambe a ku ranza Nungungulu ni ku gonza ka yena. (Va Le Efesusi 6:4) A xikombiso xa nwina xa ku ranza Nungungulu xa zi kota ku khumba a timbilu ta vana va nwina. Loku yi seketelwa ka Mhaka ya Nungungulu, a gonziselelo ya nwina ya zi kota ku cica a kupima ka vana va nwina lezaku kuva ku nene. — Gonza Deuteronome 6:4-7; Mavingu 22:6.
A vanana va vuneka loku mu va tiyisa ni ku va dzunza. Kanilezi va na ni xilaveko xa ku kawukiwa ni ku layiwa. A gonziselelo leyo ya va vikela ka mahanyela lawa ma zi kotako ku va tsona litsako. (Mavingu 22:15) Hambulezo, a kulaya loko a ku faneli kuva ka tihanyi kutani ka xapi. — Gonza Va Le Kolosi 3:21.
A Timboni ta Jehova ti humesa mabhuku yo hlaya lawa ma tsalelwako nguvunguvu ku vuna vapswali ni vana vabye. A mabhuku lawo ma seketelwa ka Biblia. — Gonza Tisimu 19:7, 11.
Hi alakanya ku u ta zvi tsakela
A NGANGO WA WENA WU NGA TSAKA
Lava Nungungulu lezaku a ku vuna kuva ni wukati go tsakisa
A ku ti maha ziwutiso zimbiri za zi tsongwani zi nga chukwatisa a wukati ga wena.
A NGANGO WA WENA WU NGA TSAKA
Malulamisela ya zikarato
A malulamisela ya zikarato hi wona ma to gema ku a wukati ga nwina gi tava go tiya ni go tsaka kutani gi nga tiyangiko ni go swira ke.
