XIGONZO 6
Xana a vafileko va nga tlhela va hanya?
1. Hi wahi a mahungu yo saseka xungetano hi vafileko?
A xikhati lexi Jesu a chikeleko Betania, kusuhani ni Jerusalema, ku wa hunza mune wa masiku a munghana wakwe Lazaru na a file. Jesu i loya xilahleni na Marta zinwe na Maria, a vamakabye va matsuva loye. Hi xikhatanyana ku lo hlengeletana xidlemo. Xana wa zi kota ku alakanyela a kutsaka ka Marta na Maria a xikhati lexi Jesu a vuxileko Lazaru hi ka vafileko? — Gonza Johani 11:21-24, 38-44.
Marta i wa sina a ma tiva a mahungu yo saseka xungetano hi vafileko. I wa zi tiva ku ngalo Jehova i ta vuxa a vafileko lezaku va tlhela va hanya misaveni. — Gonza Joba 14:14, 15.
2. Hi xihi a xiyimo xa vafileko?
Nungungulu i byelile lezi Adamu: “Wena u tshuri, u ta tlhelela tshurini.” — GENESISI 3:19.
A vanhu va mahilwe hi ntshuri. (Genesisi 2:7; 3:19) Hina a hi zivangwa za moya zi hanyako mirini wa nyama. Hina hi zivangwa za nyama, hikwalaho a ku na xipanze nzeni ka hina xi ponako kufa. Loku hifa, a wongo ga hina gonawu gofa, a maalakanyo ya hina ma mbhela. Hi kota ya lezo, Lazaru a nga wulangi nchumu xungetano hi lomu a nga hi kona a xikhati a nga file hakuva a vafileko a va tivi nchumu. — Gonza Tisimu 146:4; Mutshawuteli 9:5, 6, 10.
Xana Nungungulu wa xanisa vanhu hi nzilo loku va file? Kota lezi a Biblia gi kombako lezaku a vafileko a va tivi nchumu, a kuswa tilweni i gonzo ya mawunwa yi rukako Nungungulu. Hambu a maalakanyo ya ku xanisa vanhu hi nzilo ma mu swira. — Gonza Jeremia 7:31.
Wona a vhidhyu Hi cihi ciyimo ca vafileko?
3. Xana a vafileko va zi kota ku wulawula na hina?
A vafileko a va zi koti ku wulawula ge hambu kuzwa. (Tisimu 115:17) Kanilezi ku na ni tingelosi to kari to biha leti ti tshukako ti wulawula ni vanhu na ti hemba tiku vanhu va fileko. (2 Pedro 2:4, Tradução do Novo Mundo) Jehova wa beletela a ku zama ku wulawula ni vafileko. — Gonza Deuteronome 18:10, 11.
4. Hi vamani va to vuxiwa hi ka vafileko?
A vanhu va timiliyoni to tala lava va nga zilahleni va ta vuxiwa lezaku va hanya misaveni. Hambu a vokari va nga mu tivangiko Nungungulu na va mahile zilo zo biha va ta vuxiwa. — Gonza Luka 23:43; Mitiro 24:15.
A vanhu lava va to vuxiwa va ta zi kota ku gonza a lisine xungetano hi Nungungulu va tlhela va kombisa a kukholwa kabye ka Jesu hi ku mu ingisa. (Kuvululelwa 20:11-13) Lava va to vuka va maha zilo za zi nene va ta hanya kala kupinzuka misaveni. — Gonza Johani 5:28, 29.
5. Xana a kuvuka ka vafileko ku hi byela yini xungetano hi Jehova?
Nungungulu i mahile lezaku a kuvuka ka vafileko ku koteka hi ku rumela a N’wana wakwe lezaku a ta hi fela. Hikwalaho, a kuvuka ka vafileko ku hi tivisa a liranzo ni wuxinji ga Jehova. A xikhati lexi a vafileko va to vuka, himani nguvunguvu u lavako ku mu wona? — Gonza Johani 3:16; Va Le Roma 6:23.
