XIGONZO 7
Xini a Mufumo wa Nungungulu?
1. Xini a Mufumo wa Nungungulu?
Zini zi mahako Jesu ava Hosi yi ringanelwako? —MARKU 1:40-42.
A Mufumo wa Nungungulu mufumo wa le tilweni. Wona wu ta valeta a mifumo yontlhe leyi yinwani wu tlhela wu maha lezaku a kuranza ka Nungungulu ku mahiwa le tilweni ni laha misaveni. A mahungu ma wulawulako hi Mufumo wa Nungungulu ma sasekile. Lokuloku, a Mufumo wa Nungungulu wu ta tatisa a xilaveko xa vanhu xa kuva ni mufumo wa wu nene. Wona wu ta tlhanganyisa a vanhu vontlhe va to ngha va hanya misaveni. — Gonza Danieli 2:44; Mateu 6:9, 10; 24:14.
A mufumo wu fanele kuva ni hosi. Jehova i lo yimisa a N’wana wakwe, Jesu Kristu, lezaku ava Hosi ya Mufumo Wakwe. — Gonza Kuvululelwa 11:15.
Wona a vhidhyu Xini a Mufumo wa Nungungulu?
2. Hikuyini Jesu a nga Hosi yi ringanelwako?
A N’wana wa Nungungulu i Hosi yi ringanelwako hi lezi a nga mu nene, na a yimelela kululama. (Johani 1:14) Yena kambe i na ni ntamu wa ku vuna vanhu hakuva i ta fumela misava na a hi le tilweni. Anzhako ka kuva a vuxilwe hi ka vafileko, i lo tlakukela tilweni a ya tshama a rinzela canjeni ga xinene ga Jehova. (Maheberu 10:12, 13) Hi kugumesa, Nungungulu i lo mu nyika ntamu wa ku sangula ku fuma. — Gonza Danieli 7:13, 14.
3. Hi vamani va to fuma na Jesu?
A ntlawa wo kari wu vitwako “vobasa” wu ta fuma zinwe na Jesu le tilweni. (Danieli 7:27) A vobasa vo sangula ku hlawulwa ku vile vapostoli vo tsumbeka va Jesu. Jehova wa ha simama ku hlawula vavanuna ni vavasati vo tsumbeka kota vobasa kala ni nyamutlha. A ku fana na Jesu, vona va vuxiwa na va hi ni miri wa moya. — Gonza Johani 14:1-3; 1 Va Le Korinte 15:42-44.
Vanhu vangani va yako le tilweni? Jesu i va vitana a ku i “ntlhambi wu tsongwani.” (Luka 12:32) Hi kugumesa, a ntsengo wabye wu tava 144.000. Vona va ta fumela misava zinwe na Jesu. — Gonza Kuvululelwa 14:1.
4. Zini zi nga maheka a xikhati lexi Jesu a nga sangula ku fuma?
A Mufumo wa Nungungulu wu sangulile ku fuma hi 1914. * A ximaho xo sangula xa Jesu kota Hosi xi vile ku hlongola Satani ni madimoni yakwe vata misaveni. Satani i lo zangara a sangula ku vanga zikarato misaveni yontlhe. (Kuvululelwa 12:7-10, 12) Kusukela xikhatini lexo, a kuxaniseka ka vanhu kuya ku engeteleka nguvu. A tiyimpi, tindlala, mitungu, ni kutsekatseka ka misava zi maha xipanze xa “xiwoniso” xa lezaku lokuloku a Mufumo wu ta wonelela hi kumbhelela a zilo zontlhe za laha misaveni. — Gonza Luka 21:7, 10, 11, 31.
5. Zini lezi a Mufumo wa Nungungulu wu zi mahako?
Hi ku tirisa a ntiro wa kuxumayela wu mahiwako misaveni yontlhe, a Mufumo wa Nungungulu wu sina wu tlhanganyisa xidlemo xa hombe xa vanhu va matiko wontlhe. A vanhu vo rula va timiliyoni va maha vafumelwi va Jesu. A Mufumo wa Nungungulu wu ta va vikela a xikhati lexi wu to lovisa a mafambisela ya zilo yo biha lawa ma nga kona zezi misaveni. Hikwalaho, vontlhe lava va lavako ku vuneka hi Mufumo wa Nungungulu va fanele ku gonza kuva vafumelwi va ingisako va Jesu. — Gonza Kuvululelwa 7:9, 14, 16, 17.
Hi xikhati xa ku ringana 1.000 wa malembe, a Mufumo wa Nungungulu wu ta tatisa a kungo go sangula ga Nungungulu xungetano hi vanhu. A misava yontlhe yi ta maha paradise. Hi kugumesa, Jesu i ta tlhelisa a Mufumo ka Dadani wakwe. (1 Va Le Korinte 15:24-26) Xana wa tiva wokari u navelako ku mu bhulela hi Mufumo wa Nungungulu? — Gonza Tisimu 37:10, 11, 29.
^ nzi. 6 Kasi ku kuma manwani mahungu xungetano hi lezi a Biblia gi profetisileko zona a lembe ga 1914, wona a maphajina 217-220 ya bhuku Zini lezi a Biblia gi hi gonzisako?
