Jehovha i no hlawula wutshamu go kari a byala zvitsangi zvo tala ni tisinya to tala a tlhela a veka zvihari kwalomo. A wutshamu lego gi wa vitaniwa ku i simu ga Edheni. Nungungulu i no gumesa a maha wanuna wo sangula hi ntshuri wa misava — ku nga Adhamu — a gumesa a mu pupuxela lomu tinhovhini takwe. Wa zvi tiva a ku zvini zvi nga guma zvi maheka? A wanuna loye i no sangula ku hanya! Jehovha i no veka Adhamu lomu sin’wini ga Edheni, a mu nyika ntiro wa ku hlayisa simu ni ku chula mavito a zvihari zvontlhe.

Jehovha i no guma a mu nyika a nayo wa lisima Adhamu. I no mu laya aku: ‘A mihandzu ya tisinya tontlhe u ngaga; kanilezvi u ngagi a mihandzu ya sinya yin’we basi yo hlawuleka. Loku uga mihandzu ya sinya leyo, u tafa’.

Hi ndzhako ka cikhati Jehovha ite: ‘Ndza ha mu mahela muvhuni Adhamu’. I no maha Adhamu a etlela wurongo ga hombe nguvhu, zvonake a mu mahela sati hi limbambu lakwe. A vito ga sati wakwe ku wa hi Evha. Adhamu na Evha va nova ngango wo sangula. U alakanya ku Adhamu i ti zwisile kuyini hi kuva ni sati? Adhamu i no tsaka nguvhu laha ka kuza  aku: ‘Hi nga wona lezvi Jehovha a nga maha hi limbambu la mina! Ndzi wa nga wuli! Ndzi mahelwe munhu wo fana na mina’.

Jehovha i no byela Adhamu na Evha lezvaku va pswala vana va tata misava. I wa lava lezvaku va tira zvin’we na va tsakile va cica misava yontlhe yiva paradhise, kutani simu go saseka, a ku fana ni simu ga Edheni. Kanilezvi, lezvi Jehovha a nga zvi lava a zvi mahekangi. Hikuyini? Hi ta zvi gondza ka cipimo ci landzelako.