Jehovha Nungungulu hi yena a nga hi vanga. I vangile zvilo zvontlhe, lezvi hi zvi wonako ni zvin’wani hi kalako hi nga zvi woni. Na a nga se vanga zvilo lezvi hi zvi wonako, i vangile tingilozi ta tatela ga cima. Wa zvi tiva a ku zvini a tingilozi? A tingilozi malandza ya Jehovha. Ti fana na yena. A ku fana ni lezvi hi nga zvi kotiko ku wona Nungungulu, tonawu a hi nge ti woni. A ngilozi yo sangula leyi Jehovha a nga yi vanga, yi gumesile yi mu vhunetela. Yi mu vhunile ku vanga tinyeleti ni zvilo zvontlhe lezvi zvin’wani. A cin’we ca zvilo lezvo, kuve misava — ku nga wutshamu go saseka legi hi hanyako ka gona.

Jehovha i no guma a longisela misava kasi a zvihari ni vanhu va hanya kona. I no vanga gambo kasi gi woningela misava. A tlhela a vanga zvitsunga, mabimbi ni micongo.

Wa zvi tiva lezvi zvi nga guma zvi maheka? Jehovha ite: ‘Ndzi lava ku vanga byanyi ni tisinya’. Ku no mila tisinya to hambanahambana to pswala mihandzu, matsawu, ni zvitsangi. Jehovha i no guma a vanga zvihari zvontlhe — lezvi zvo puruma, lezvi zvo hlambela, lezvi zvo ndzundza, ni lezvi zva ku nonoka loku zvi famba. I no vanga zvihari zva zvi tsongwani zvo kota makondlo; ni zva hombe zvo kota tindlovhu. Cihari muni leci u ci randzako nguvhu?

Jehovha i no guma a byela ngilozi yakwe yo sangula aku: ‘A hi mahe munhu’. Va no maha vanhu va hambana ni zvihari. Va zvi kota ku maha zvilo. Va zvi kota ku wulawula, va hleka, ni ku maha mukombelo.  Va va mahile lezvaku va hlayisa misava ni zvihari. Wa zvi tiva a ku himani a munhu wo sangula va nga mu maha? A hi zvi wone ka cipimo ci landzelako.