A hosi yin’wani yi fumileko le Bhabhuloni kuve Dhariyusi a muMedhi. Dhariyusi i no wona lezvaku Dhaniyeli i wa hi ni wutlhari ku hundza van’wani. Hikwalaho, i no mu hlawula lezvaku ava murangeli wa vavanuna va lisima nguvhu va tiko. A vavanuna lavo va wa nga mu randzi Dhaniyeli. Hikwalaho, va wa nga ha lavi ni ku mu wona. Va wa zvi tiva ku Dhaniyeli i maha mukombelo makhati manharu siku ni siku. Hikwalaho, va no byela Dhariyusi vaku: ‘Hosi, ku fanele ku yimisiwa nayo wu wulako lezvaku vontlhe va fanele ku maha mukombelo ka wena basi. Ni wihi a to kala ku ingisa nayo lowu, i fanele ku hoxiwa lomu nkeleni wa tinghala’. Dhariyusi i no vhumela mawonela lawo, a gumesa a sayina nayo lowo.

A cikhati leci Dhaniyeli a ngazwa nayo lowu wa muswa, i no tekela kuya kaya. I noya khizama laha janeleni gakwe, a maha mukombelo ka Jehovha. A vavanuna lavo va ciluse va no tsutsuma va ya mu kuma na a maha mukombelo. Va no tsutsuma va ya byela Dhariyusi vaku: ‘Dhaniyeli a nga ku ingisi. I maha mukombelo ka Nungungulu wakwe makhati manharu siku ni siku’. Dhariyusi i wa mu randza Dhaniyeli niku i wa nga lavi ku a dawa. I no tshama siku gontlhe na a zama ku lavetela ndlela yo ponisa Dhaniyeli. Kanilezvi hambu yena kota hosi i wa nga hi na fanelo ya ku cica nayo a wu sayinileko. I wa fanele ku ruma vavanuna vakwe lezvaku va hoxa Dhaniyeli lomu nkeleni wa tinghala leto to leva.

 Ni wusiku ga kona, Dhariyusi i no karateka hi kota ya Dhaniyeli laha ka kuza a nga zvi koti ni ku kuma wurongo. Ni mixo, i no tsutsuma aya nkeleni a ya vitana Dhaniyeli aku: ‘Dhaniyeli, Nungungulu wa wena i ku ponisile’?

Dhariyusi i nozwa gezu go kari. Ku wa hi Dhaniyeli! I no hlamula Dhariyusi aku: ‘A ngilozi ya Jehovha yi vhalile milomu ya tinghala. Ne a ti ndzi bayisangi’. Dhariyusi i no tsaka nguvhu! I no rumisa lezvaku va humesa Dhaniyeli lomu nkeleni. Dhaniyeli i wa nga kwarambutiwangi. A hosi yi no gumesa yi ruma vanhu yiku: ‘A vavanuna lava va nga lumbeta Dhaniyeli va hoxeni lomu nkeleni wa tinghala’. A cikhati leci a vavanuna lavo va nga hoxelwa lomu nkeleni, a tinghala ti no va handzulela.

Dhariyusi i no rumela nayo lowu ka vanhu vakwe aku: ‘A vanhu vontlhe va fanele ku chava a Nungungulu wa Dhaniyeli. I ponisile Dhaniyeli lomu ka tinghala’.

Wa maha mukombelo ka Jehovha siku ni siku a ku fana na Dhaniyeli?