Makunu ku wa hundza cipimo ya 70 wa malembe a vaIzrayeli na va tlhelile le Jerusalema. Kanilezvi, a van’wani va wa ha hanya ka matshamu yo hambanahambana ya Mufumo wa Persiya. A mun’we wabye ku wa hi Ezra, loyi a nga gondzisa Nayo wa Jehovha. Ezra i no tiva lezvaku a vanhu le Jerusalema va wa nga ingisi Nayo wa Jehovha. Hikwalaho, i no zvi wona zvi hi chukwana kuya a ya va vhuna. Artaxerxesi, a Hosi ya Persiya, i no mu byela lezvi: ‘Nungungulu i ku nyikile wutlhari ga ku gondzisa Nayo wakwe. Teka ni wihi u mu lavako u famba naye’. Ezra i no tlhangana ni vontlhe va nga lava ku tlhela Jerusalema. Va no maha mukombelo ka Jehovha kasi a va vhikela lomu ndleleni leyo yo leha. Loku va mbhetile, va no suka va famba.

Loku ku hundzile 4 wa tihweti, va no chikela le Jerusalema. A tihosana ti no byela Ezra tiku: ‘A vaIzrayeli va tsikile ku ingisa Jehovha va tlhela va teka vavasati va khozelako zvifananiso’. Zvini lezvi Ezra a nga maha? Ezra i no khizama mahlweni ka vanhu a maha mukombelo aku: ‘Jehovha, u hi mahele zvilo zvo tala nguvhu. Kanilezvi, hina hi ku wonhele’. A vanhu va no tizwa nandzu. Kanilezvi, va wa ha lava ku vhuniwa kasi va tsika ku maha zvilo zvo biha. Ezra i no hlawula madhota ni valamuli lezvaku va khatalela mhaka leyi. Ka tihweti tinharu ti nga landzela, lava va nga kala va nga khozeli Jehovha va wo hlongoliwa.

Ku no hundza 12 wa malembe. Ndzeni ka cikhati leco, va no aketa a muru wa Jerusalema. Ezra i no tlhanganisa vanhu lezvaku va ta lera a Nayo wa Nungungulu. A cikhati leci Ezra a nga vhulula bhuku, a vanhu va no suka va yima. I no dhumisa Jehovha zvonake a vanhu va tlakusa mawoko va mu dhumisawu. Ezra i no gumesa a lera Nayo a tlhela a wu tlhamusela. A vanhu va no tshama vaku hwi va ingisela khwatsi. Va no vhumela lezvaku va wa tsikile ku ingisa Jehovha kambe, zvonake va rila. Ka siku gi nga landzela, Ezra i no tlhela a va lerela Nayo kambe. Va no tiva lezvaku  va wa fanele ku maha Mubuzo wa Mixaxa na ku nga hi kale. Va no tekela ku sangula ku longisela festa leyo.

Ndzeni ka 7 wa masiku lawo ya festa, va no tsaka va bonga Jehovha hi lezvi va nga pfunile. Kusukela masikwini ya Joxuwa, ku wa nga se tshuka ku mahiwa Mubuzo wa Mixaxa wo fana ni lowo. Loku a festa leyo yi mbhelile, a vanhu va no tlhangana va maha mikombelo, vaku: ‘Jehovha u hi tlhatlhisile wubochweni, u hi hlayisa lomu ciwuleni u tlhela u hi nyika tiko legi go saseka. Kanilezvi, hina hi tshama hi ku tsika ku ku ingisa. U rumele vaphrofeti lezvaku va ta hi vhuna; kanilezvi a hi ingisangi. Hambulezvo, u simamile ku hi kombisa lihlazva-mbilu. U mahile lezvi u nga tsumbisa Abrahama. Makunu lezvi, ha tsumbisa ku hi ta ku ingisa’. Va no tsala lezvi va nga tsumbisa zvonake a tihosana, vaLevhi ni vapristi va vekela cifungo.