A vanhu va le Judha va no fularela Jehovha hi ku phindaphinda, va khozela zvifananiso. Jehovha i no zama ku va vhuna hi malembe yo tala. I no rumela vaphrofeti vo tala kasi ku ya va tlharihisa, kanilezvi a va ingisangi. Va wo hleka vaphrofeti lavo. Makunu, zvini a nga maha Jehovha kasi ku fuvisa wukhozeli ga zvifananiso?

Nebhukadnezare, a hosi ya Bhabhuloni, i wa kari a hlula matiko yo tala hi gin’we gin’we. Ka khati go sangula a nga hlula Jerusalema, i khomile Hosi Jehoyakina, ni tihosana, ni masochwa ni vavatli a famba navo Bhabhuloni. I no teka ni zvibya zva lomu tempeleni ya Jehovha, a gumesa a yimisa Zedhekiya lezvaku a maha hosi ya Judha.

Kusanguleni Zedhekiya i wa ingisa Nebhukadnezare. Kanilezvi, a vanhu va matiko lawa va nga gamekene nawo ni vaphrofeti va mawunwa va no kucetela Zedhekiya lezvaku a tsika ku ingisa hosi ya Bhabhuloni. Jeremiya i no tlharihisa Zedhekiya aku: ‘Loku u tsika ku ingisa vaBhabhuloni, lomu Judha ku ta dayelwa vanhu, kuva ni ndlala ni mababyi yo tala’.

Loku ku hundzile 8 wa malembe na a kari a fuma, Zedhekiya i no tsika ku ingisa vaBhabhuloni. I no kombela masochwa ya vaGibhite lezvaku ma mu vhuna. Nebhukadnezare i no rumela masochwa yakwe lezvaku ma yalwa ni Jerusalema. Loku ma chikele, ma no ya gwimba matenda lomu matlhelweni ya dhoropa. Jeremiya i no byela Zedhekiya aku: ‘Jehovha i wula lezvaku loku u ti nyikela ka vaBhabhuloni, wena ni dhoropa mu ta pona. Kanilezvi loku u nga ti nyikeli, a vaBhabhuloni va ta hisa Jerusalema giku bhi, va tlhela va ku khoma va ya ku vhalela’. Zedhekiya aku: ‘Ndzi nga ta ti nyikela’!

 Loku ku hundzile lembe ni khihlanya, a masochwa ya Bhabhuloni ma no khungumula makhurisi ya Jerusalema ma gi hisa hi ndzilo. Ma no hisa tempeli ma daya vanhu vo tala, ma tlhela ma khomela van’wani va ku tala nguvhu ma ya va vhalela paxweni.

Zedhekiya i no huma lomu Jerusalema a tsutsuma. Kanilezvi a vaBhabhuloni va no mu hlongola. Va no ya mu khoma kusuhani ni Jeriko, va gumesa va mu heleketa ka Nebhukadnezare. Nebhukadnezare hosi ya Bhabhuloni, i no khoma Zedhekiya kasi a wona vana vakwe na va dawa zvonake a mu bhoxa matihlo. I no gumesa a mu teka a ya mu vhalela paxweni kala a fela lomo. Hambulezvo, Jehovha i no tsumbisa vanhu va ka Judha aku: ‘Loku ku hundza 70 wa malembe, ndzi ta mu tlhelisa kaya ka n’wina Jerusalema.’

Zvini zvi nga wa ta humelela ka vaswa lava va nga khomilwe va ya Bhabhuloni? Va wa ta simama va tsumbeka ka Jehovha?