Masikwini ya Ezra, ku wa hi ni muIzrayeli wa ku hi Nehemiya a nga hi citiri ca Artaxerxesi, a Hosi ya Xuxani — gi nga hi dhoropa ga tiko ga Persiya. A makabye wa Nehemiya i no mu endzela a ya mu byela mahungu yo kala ku tsakisa. I te: ‘A vanhu va nga le Jerusalema va le kuxanisekeni ka hombe nguvhu. A muru wa dhoropa lowu a vaBhabhuloni va nga hohlola a wu se vhuxiwa’. Nehemiya a zvi mu tsakisangi. I no zvi wona zvi hi chukwana kuya Jerusalema a ya va vhuna. Hikwalaho, i no maha mukombelo kasi a hosi yi vhumela ku mu tsika a famba.

Ka siku go kari, a hosi yi no wona lezvaku Nehemiya a ga tsakangi. Yiku: ‘A ndzi se ku wonisa lezvi! Zvini’? Nehemiya aku: ‘A ndzi nge xalali kuveni Jerusalema a dhoropa ga hina gi hohlokile’. A hosi yi no mu wutisa yiku: ‘U lava ku ndzi ku mahela yini’? Nehemiya i no tekela ku maha mukombelo hi le mbilwini, zvonake aku: ‘Ndzi kombela ku u ndzi tsika ndziya Jerusalema ndzi ya aketa muru wa gona’. Hosi Artaxerxesi i no byela Nehemiya lezvaku a nga famba, a tlhela a mu mahela lezvi zvi nga laveka kasi a famba khwatsi kala kuza a chikela. I no tlhela a mu yimisa kota hosana ya tiko ga Judha, a mu nyika ni mapulangu kasi a maha hi wona tivati ta dhoropa.

Loku Nehemiya a chikele le Jerusalema, i no hlola muru wa kona, zvonake a vitanisa vapristi ni tihosana a ta va byela lezvi: ‘A ciyimo leci a hi ci nene. Hi fanele ku suka hi tira’. A vanhu va no vhumela, va sangula ku aka muru.

Kanilezvi, a vanhu vo kari va nga zonda vaIzrayeli va no sangula ku va hleka vaku: ‘A muru lowo mu akako hambu hlati gi nga wu nikinya wuwa’. Lava va nga kari va aka, a va chelangi kota hi ciruko leco, va no simama ku aka. Va no aka muru wa hombe wu tlhela wu tiya.

A valala vabye va no boha cikungo ca ku vata hi matlhelo yo hambanahambana va ta dhumela Jerusalema hi citshuketi. A cikhati leci a vaJudha va nga zvizwa, va no chava. Kanilezvi, Nehemiya i no va byela lezvi: ‘Mu nga chavi. Jehovha i na hina’. I no yimisa vanhu lezvaku va vhikela lava va nga aka. Hikwalaho, a valala a va zvi kotangi ku va dhumela.

 Va no mbheta ku aka muru wontlhe ni tivati ta wona hi 52 wa masiku basi. Nehemiya i no vitanisa vaLevhi vontlhe le Jerusalema lezvaku va ta maha festa, va tsakela lezvi va nga mbheta ku aka. I no va veka hi mitlawa yimbiri kasi va yimbelela. Va no kandziha hi zvikadha va huma, a ntlawa mun’we wu famba hi seno, lowu wun’wani wu famba hi tlhelo legi gin’wani, va rendzelekela dhoropa. Va noba tingoma, timbila ni zvitende va yimbelela ka Jehovha. Ezra i no famba ni ntlawa mun’we, Nehemiya a famba ni lowu wun’wani kala va ya kumana le tempeleni. A vanhu vontlhe — vanana ni vahombe — va no maha minyikelo ka Jehovha va tsaka. A magezu yabye ya kutsaka ma wa zwala kule.