Hi kufamba ka cikhati, Bhelxazare i no maha hosi ya Bhabhuloni. Ka wusiku go kari, i no maha festa a ramba 1000 wa vanhu va lisima nguvhu lomu tikweni. I no ruma vatiri vakwe lezvaku va ya mu tekela tikopo ta ndzalama leti Nebhukadnezare a nga tekile lomu tempeleni ya Jehovha. Bhelxazare ni vapfhumba vakwe va nonwa hi tikopo leto va tlhela va dhumisa vanungungulu vabye. Ku no humelela canja ga munhu hi citshuketi gi sangula ku tsala zvilo zvo hlamalisa laha khurisini ga yindlu leyi va nga gela kona.

Bhelxazare i no sangula ku chava. I no vitana tin’anga takwe a ta ti tsumbisa lezvi: ‘Loku a mun’we wa n’wina a zvi kota ku ndzi byela ku a magezu lawa ma wula yini, i tava wa wunharu hi lisima lomu Bhabhuloni’. A tin’anga ti no zama, kanilezvi ne yin’we a yi zvi kotangi ku mu byela ku a magezu lawo ma wula yini. Mamani wa hosi Bhelxazare i no nghena lomu ndlwini aku: ‘Ku na ni wanuna wa ku hi Dhaniyeli a nga tolovela ku mu tlhamusela zvilo zvo karata Nebhukadnezare. A nga zvi kota ku ku byela ku a magezu lawa ma wula yini’.

Dhaniyeli i noya ka hosi Bhelxazare zvonake Bhelxazare aku: ‘Loku u zvi kota ku lera magezu lawa u tlhela u ndzi byela a ku ma wula yini, ndzi ta ku nyika kordhawu ga ndzalama ndzi tlhela ndzi ku maha wa wunharu hi lisima lomu Bhabhuloni’. Dhaniyeli aku: ‘A ndzi zvi lavi zvilo zva wena. Hambulezvo, ndzi ta ku byela ku a magezu lawa ma wula yini. A papayi wa wena Nebhukadnezare i wa hi munhu wa matshandza. Hikwalaho, Jehovha i no mu susa musi. Wena wa zvi tiva khwatsi zvontlhe lezvi zvi nga mu humelela. Hambulezvo, wa ha kanyisa Jehovha hi kunwa vhinya hi tikopo takwe ta ndzalama ti nga hi lomu Tempeleni Yakwe. Hikwalaho, Jehovha i tsalile magezu lawa: Mene, Mene, Tekel, Ufarsin. A magezu lawa ma wula ku a vaMedhi ni vaPersiya va ta hlula Bhabhuloni, niku wena u nga ta ha fuma’.

Cikhatini leco, zvi wa wonekisa ku khwatsi a ku na tiko gi nga hi ni ntamu wa ku hlula Bhabhuloni. A dhoropa legi gi wa bhiyilwe hi muru wo tiya gi tlhela gi randzelwa  hi congo wo eta nguvhu. Hambulezvo ka wusiku galego, a vaMedhi ni vaPersiya va no gi dhumela. Kurusi, a Hosi ya Persiya, i no jikisa mati ya congo kasi a masochwa yakwe ma zvi kota ku tsemakanya ma kwela kala laha nyangweni ya dhoropa. Loku ma chikele, ma no kuma lezvaku a tivati ti wa vhululilwe! A masochwa ma no nghena lomu dhoropeni, ma gi hlasela ma tlhela ma daya hosi. Kurusi a gumesa a fumela Bhabhuloni.

Na ku nga se hundza lembe, Kurusi i no tivisa lezvi: ‘Jehovha i ndzi rumile a ku ndzi vhuxa tempeli yakwe le Jerusalema. Ni wihi cikari ka vanhu vakwe a lavako ku vunetela i wa fambe’. Kota lezvi Jehovha a nga tsumbisile futsi, a vaJudha vo tala va no tlhela Jerusalema loku ku hundzile 70 wa malembe na gi hahlulilwe. Kurusi i no tlhelisa tikopo ta ndzalama ni ta silivha leti Nebhukadnezare a nga tekile lomu tempeleni. Wa zvi wona lezvi Jehovha a nga mu tirisisa zvona Kurusi kasi ku vhuna vanhu vakwe ke?