Ka wusiku go kari, Hosi Nebhukadnezare i no lora zvilo zvo hlamalisa. Zvi no mu karata nguvhu laha ka kuza a nga gi kumi ni wurongo. I no vitanisa tin’anga takwe a taku: ‘Ndzi byeleni ku a noro wa mina wu wula yini’. A tin’anga tiku: ‘Hosi, hi byele lezvi u nga lora’. Kanilezvi, Nebhukadnezare a nga vhumelangi, i te: ‘Ahihi! Ndzi byeleni n’wina a ku zvini ndzi nga lora, ndzi nga mu daya’. A tin’anga ti no phinda tiku: ‘Hi byele lezvi u nga lora, hi ta gumesa hi ku byela a ku zvi wula kuyini’. Nebhukadnezare aku: ‘N’wina n’wentlhe mo zama ku ndzi kanganyisa. Wulani ku zvini ndzi nga lora’. Ti no mu hlamula lezvi: ‘A ku na munhu a zvi kotako ku maha lezvo. Lezvi u zvi kombelako a zvi koteki’.

Nebhukadnezare i no zangara nguvhu laha ka kuza a rumisa lezvaku ku dawa titlhari tontlhe ta lomu Bhabhuloni — lezvo ku wa patsiwa na Dhaniyeli, Xadrake, Mexake na Abhed-nego. Dhaniyeli i no kombela ku a hosi yi mu nyika cikhatanyana. Dhaniyeli ni vanghana vakwe va vanharu va no kombela Jehovha lezvaku a va vhuna. Zvini lezvi Jehovha a nga maha?

Jehovha i no tirisa muwoniso, a komba Dhaniyeli lezvi Nebhukadnezare a nga lorile a tlhela a mu byela ku zvi wula yini. Loku gi cile, Dhaniyeli i noya ka vatiri va hosi a yaku: ‘Mu nga dayi ne tlhari yin’we ya hosi. Mina ndzi nga yi byela hosi ku zvi wula yini lezvi yi nga lora’. A vatiri va no teka Dhaniyeli va famba naye ka Nebhukadnezare. Dhaniyeli i no ya byela hosi aku: ‘Nungungulu i ku tivisa lezvi zvi to maheka cikhatini ci tako. Lezvi u nga lora hi lezvi: U wonile cifananiso ca hombe, ci nga ni hloko ya ndzalama; a cifuva ni mawoko zva silivha, laha ka rumbu kala lomu ka madzolo ka suku, a minenge ya cona ya ciketse, a mikondzo ya cona ya ciketse ci vhuvilweko ni wumba. Ku no gumesa ku suka ribye hi le citsungeni gi taba cifananiso hi laha mikondzweni. A cifananiso leco ci no fayekela ci maha mpupu. Ku noba moya wu ta ci hangalasa. A ribye lego gi no maha citsunga ca hombe, ci tata misava yontlhe’.

 Dhaniyeli a guma aku: ‘A noro wa wena wu wula lezvi: A hloko ya ndzalama yi yimela mufumo wa wena. A cipandze ca silivha ci yimela mufumo wu to landzela lowu wa wena. Ku tata mufumo wun’wani wo fana ni suku, wu to fumela misava yontlhe. Lowu wu to landzela lowo, wu tava wa ntamu ni ku tiya ku fana ni ciketse. Hi kugumesa, ku tava ni mufumo wu tova wo tiya ku fana ni ciketse wu tlhela wu fana ni wumba hi ku kala ku tiya. A ribye legi gi nga maha citsunga ku wuliwa Mufumo wa Nungungulu. A Mufumo lowu wu ta fuvisa mifumo yontlhe wu tshama kala kupindzuka’.

Nebhukadnezare i no koramela Dhaniyeli, zvonake aku: ‘Hi Nungungulu wa wena a nga ku byela lezvi ndzi nga lora ni ku zvi wula yini. A ku na Nungungulu wo fana naye’. Nebhukadnezare a nga mu dayangi Dhaniyeli. Kanilezvi, i no mu yimisa kota murangeli wa titlhari tontlhe a tlhela a mu yimisa kota hosana lomu Bhabhuloni. Wa zvi wona lezvi Jehovha a nga hlamulisa zvona a mukombelo wa Dhaniyeli?