Johani, a n’wana wa Zakariya na Elizabheti, i no maha muphrofeti a cikhati leci a nga kula. Jehovha i rumile Johani a chumayela vanhu lezvaku Mesiya wata. Johani a nga gondzisangi lomu ka tiyindlu leti a vanhu va nga khozela ka tona, ne lomu ka zvidhoropana. Kanilezvi, i gondzisile lomu ciwuleni. A vanhu va wata hi Jerusalema ni lomu Judhiya gontlhe va ta gondzisiwa hi Johani. I va gondzisile lezvaku kasi va tsakelwa hi Nungungulu, va fanele ku tsika ku maha zvilo zva kubiha. Loku va ingisele lezvi Johani a nga kari a gondzisa, a votala va no ti sola zviwonho zvabye, zvonake Johani a va bhabhatisa lomu Congweni wa Jordhani.

Johani i wa hanya wutomi go olova. I wa boha tinguwo ta ku mahiwa hi bhebhe ga kameli niku i waga humbi ni wulombe. Johani i wa hlamalisa vanhu vo tala. Hambu vaFarisi ni vaSadhusi va nga hi vanhu va matshandza, va noya mu wona. Johani i no va byela lezvi: ‘Mu fanele ku ti sola mu cica mahanyela ya n’wina. Mu nga alakanyi lezvaku mu hlawulekile hi kota ya lezvi mu nge mu vana va Abrahama. Lezvo a zvi wuli ku mu vana va Nungungulu’.

A vanhu vo tala va waya ka Johani va ya mu wutisa lezvi: ‘Zvini hi faneleko ku maha kasi hi tsakelwa hi Nungungulu’? Johani i byelile vaJudha aku: ‘Loku mu hi ni mabhaji mambiri, nyikelani gin’we ka loyi a nga hava’. Wa zvi tiva a ku hikuyini a nga wula lezvo? I wa lava ku a vanhu va tiva lezvaku kasi va tsakelwa hi Nungungulu, va fanele ku randza van’wani.

Johani i no byela vahlengisi va mikhupo aku: ‘Mu fanele ku tsumbeka mu tlhela mu nga kanganyisi vanhu’. I no byela masochwa aku: ‘Mu nga vhumeli ku xavelelwa ne mu nga hembi’.

 A vapristi ni vaLevhi vonawu va nota ka Johani va ta mu wutisa, vaku: ‘Kasi hi wena mani? Vontlhe va lava ku zvi tiva’. Johani aku: ‘Mina ndzi gezu gi humako le ciwuleni, gi yisako vanhu ka Jehovha, kota lezvi muphrofeti Isaya a nga wula’.

A vanhu va wa zvi randza nguvhu lezvi Johani a nga kari a va gondzisa. A votala va wa ti wutisa ku Johani hi yena Mesiya ke. Kanilezvi, i no va byela lezvi: ‘Kuta munhu wa hombe ku hundza mina. Mina ne a ndzi ringanelwi hi ku tlhatlha tingoti ta masandaliya yakwe. Mina ndzi bhabhatisa hi mati, kanilezvi yena i ta bhabhatisa hi moya wa ku basa’.