Elizabheti i wa hi ni xaka ga ndzisana ka yena gi nga hanya dhoropeni ga Nazareta, le Galileya. A xaka lego hi Mariya. Mariya i wa hi lomu ka ku gangisana na Josefa, loyi a nga hi muvatli. A cikhati leci a nyimba ya Elizabheti yi nga hi ni 6 wa tihweti, Mariya i no endzelwa hi ngilozi Gabriyeli, yi yaku: ‘Xewe Mariya. Jehovha i ku tsakele nguvhu’. I wa nga zvi zwisisi lezvi Gabriyeli a nga zvi wula. Gabriyeli i no gumesa aku: ‘U ta xura nyimba u pswala n’wana wa mufana. Mu chule ku hi Jesu. A n’wana loye i ta maha Hosi. A Mufumo wakwe wu ta tshama kala kupindzuka’.

Mariya aku: ‘Ndzi ta pswalisa kuyini n’wana? Phela mina a ndzi se etlela ni wanuna’! Gabriyeli aku: ‘Jehovha a nga tsandzeki ku maha nchumu. A moya wa ku basa wu tata ka wena, zvonake u ta xura nyimba u pswala n’wana. A xaka ga wena Elizabheti yenawu i xurile nyimba zvezvi a kumbileko’. Mariya i no gumesa aku: ‘Ndzi nandza ga Jehovha. A zvi maheke ka mina lezvi u zvi wulileko’.

 Mariya i no gumesa a endza a ya vhuxela Elizabheti, le dhoropeni gakwe gi nga hi le zvitsungeni. A cikhati leci va nga losana, Elizabheti i nozwa cin’wanana cakwe lomu ndzeni na ci tlula. I no tala hi moya wa ku basa, zvonake aku: ‘Mariya, Jehovha i ku katekisile. Wudzundzo ka mina a ku wona mamani wa Hosi ya mina laha kaya ka mina’. Mariya aku: ‘Ndza mu dzundza Jehovha hi mbilu ya mina yontlhe’. Mariya i no tshama na Elizabheti hi tihweti tinharu, a gumesa a tlhela kaya le Nazareta.

A cikhati leci Josefa a nga tiva lezvaku Mariya i na ni nyimba, i wa lava ku mu tsika. Kanilezvi, i no lora ngilozi na yita yi ta mu byela lezvi: ‘U nga chavi ku chadha na Mariya. A nga mahangi nchumu ca kubiha’. Josefa i no chadha na Mariya futsi, a mu teka va ya tshama zvin’we.