Loku ku hundzile a 400 wa malembe a muru wa dhoropa ga Jerusalema na wu vhuxisilwe, ku nova ni wanuna wa ku hi Zakariya a nga hanya ni sati wakwe Elizabheti laha kusuhani ni dhoropa lego. Ku wa hundza malembe yo tala na va chadhile; kanilezvi, va wa nga hi na n’wana. Ka siku go kari Zakariya na a hisa libani lomu wutshan’wini go basabasa ga tempeli, i no wona ngilozi ya ku hi Gabriyeli. Zakariya i no chava. Kanilezvi, Gabriyeli aku: ‘U nga chavi. Jehovha i ndzi rumile ku ta ku byela mahungu ya ma nene. A sati wa wena Elizabheti i ta pswala n’wana wa mufana, a vito gakwe i tava Johani. Jehovha i hlawulile Johani lezvaku a maha ntiro wo hlawuleka’. Zakariya i no mu wutisa lezvi: ‘Cini ci to ndzi kholwisa lezvi u wulako? Phela mina ni sati wa mina hi kumbile nguvhu. A zvi nge koteki a ku hi pswala n’wana’. Gabriyeli aku: ‘Ndzi rumilwe hi Nungungulu kasi ndzi ta ku byela mahungu lawa. Lezvi u kalako u nga kholwi, u nga ta ha zvi kota ku wulawula kala a n’wana loye a pswaliwa’.

Zakariya i no hlwela nguvhu lomu wutshan’wini go basabasa a ku hundza masiku man’wani. A cikhati leci a nga huma, lava va nga kari va rindzela lahandle va wa lava ku tiva ku hikuyini nga hlwela. Zakariya i wa nga ha zvi koti ku wulawula. I wo kota ku wulawula hi mawoko basi. A vanhu va no tekela ku zvi tiva ku i byelilwe mahungu ma ngata hi ka Nungungulu.

Hi kufamba ka cikhati, ku no maheka zvalezvi a ngilozi yi nga zvi wula futsi. Elizabheti i no pswala n’wana wa mufana. A vanghana ni maxaka yakwe va nota va ta wona n’wana loye. Va no tsaka hi lezvi a nga pswala n’wana. Elizabheti i no va byela lezvi: ‘Hi lava ku mu chula ku hi Johani’. Vona vaku: ‘A mu na xaka ga ku hi Johani! Mu chuleni vito ga papayi wakwe, muku hi Zakariya’. Kanilezvi, Zakariya i no tsala aku: ‘A vito gakwe hi Johani.’ Ka cikhati leco, Zakariya i no tlhela a sangula ku wulawula! Zvi no tiveka lomu Judhiya gontlhe a ku Zakariya na Elizabheti va  pswalile n’wana. A vanhu va no hlamala zvonake vaku: ‘A n’wana loye, loku a ta kula zvi kona a to maha’!

Zakariya i no tala hi moya wa ku basa, a phrofeta aku: ‘A dhumiswe Jehovha. I tsumbisile Abrahama lezvaku i ta rumela muhanyisi, ku nga Mesiya, lezvaku a ta hi hanyisa. Johani i tava muphrofeti. I ta longisela ndlela kasi kuta Mesiya’.

A xaka ga Elizabheti ga ku hi Mariya gi no humelelwa hi zvilo zvo hlamalisa. Hi ta zvi wona ka cipimo ci landzelako.