Andzhako ka loku Jesu a chumayele hi cipimo ca lembe ni khihlanya, ku no laveka lezvaku a maha ciboho ca lisima. I wa fanele ku hlawula lava a nga wa ta tira navo cikhati contlhe a tlhela a va gondzisa kasi va ta rangela bandla ga wuKristu. Jesu i wonile lezvaku kasi a maha zviboho lezvo, i wa fanele ku vhuniwa hi Jehovha. Hikwalaho, i noya citsungeni laha a nga wa tava yece. Loku a chikele, i no maha mukombelo wusiku gontlhe. Ni mixo ya kona, i no vitana a vapizani vo kari zvonake a hlawula 12 wa vapostoli. Wa alakanya mavito ya vokari ke? A mavito yabye hi lawa: Pedro, Andrewu, Jakobe, Johani, Filipu, Bhartolomewu, Tomasi, Matewu, Jakobe n’wana Alfewu, Tadhewu, Simoni na Judha Iskariyoti.

Lava va 12 va wa ta fambafamba na Jesu. Loku a va gondzisile, i no va ruma va famba va chumayela voce. Jehovha i no va nyika ntamu wa ku hlongola madhimoni ni ku hanyisa vababyi.

Lava va 12 i wa va vitana ku vanghana vakwe niku i wa va tsumba. A vaFarisi va wa wona vapostoli kota vanhu vo kala ku gondza ni vo kala  ku vhuna nchumu. Kanilezvi, Jesu i no va gondzisa ku maha ntiro lowu a nga va nyikile. Va wa tava na Jesu ka zvikhati zva lisima nguvhu wutomini gakwe, zvo fana ni cikhati leci a nga lava ku dawa ni loku a vhuxilwe hi ka vafileko. A ku fana na Jesu, a kutala ka lava va 12 va wa hi va le Galileya. A vokari va wa chadhile.

A vapostoli va wa hi vanhu vo kala ku mbhelela lava va nga maha zvihoxo. Ka zvikhati zvo kari, va wa wulawula na va nga rangangi hi ku pimisa va tlhela va maha zviboho zvo kala zvi nga hi zvi nene. Makhati man’wani va wa nga hi na lihlazva-mbilu. Va zile va holova hi ku lava ku tiva ku himani a nga wa lisima nguvhu laha kabye. Kanilezvi va wa hi vanhu va va nene va nga randza Jehovha. Hi vona va nga wa tava zviro zvo sangula zva bandla ga wuKristu loku Jesu a tlhelile tilweni, va tlhela va maha ntiro wa lisima nguvhu.