Loku Jesu a bhabhatisilwe, ku no hundza cikhati citsongwani zvonake a sangula ku chumayela, aku: ‘A Mufumo wa Nungungulu wu tshinele’. A cikhati leci a nga kari a fambafamba lomu Galileya ni Judha a chumayela, i wa landzelwa hi vanhu. Laha a nga tlhela cidhoropaneni cakwe le Nazareta, i noya lomu sinagogeni a ya vhulula bhuku ga Isaya a gi lera hi gezu go tlakuka aku: ‘Jehovha i ndzi nyikile moya wa ku basa kasi ndzi chumayela mahungu yo saseka’. Zvi wa wula yini lezvo? Zvi wa wula lezvaku a nchumu wo sangula lowu Jehovha a nga mu nyikela wona a moya wa ku basa, ku wa hi ku chumayela mahungu yo saseka — hambu lezvi a vanhu va nga lava ku mu wona na a maha zvihlamaliso. Jesu i no byela vanhu kambe aku: ‘Nyamutlha a ciphrofeto leci ci tatisekile’.

Hi kulandzela, Jesu i noya le Bimbini ga Galileya a ya kuma mune wa vavanuna va nga tira ku phasa tinjhanjhi, lava va nga gumesa vava vapizani vakwe. I no va ramba, aku: ‘A hi fambeni, ndzi ta mu gondzisa ku kukuta vanhu’. A vavanuna lavo, ku wa hi Pedro na Andrewu na Jakobe na Johani. Va no tekela ku tsika ntiro wabye wa ku kukuta ni ku xavisa tinjhanjhi, va mu landzela. Va no fambafamba lomu Galileya gontlhe va chumayela xungetano hi Mufumo wa Jehovha. Va wa chumayela lomu masinagogeni, lomu mabazarini ni lomu maruweni. Ni kwihi lomu va ngaya kona, va wa landzelwa hi vanhu vo tala. Lezvi Jesu a nga kari a zvi maha zvi no zwala kule, zviza zvi chikela ni le Siriya.

Hi kufamba ka cikhati, Jesu i no va nyika ntamu a vapizani vokari lezvaku va hanyisa vanhu ni ku hlongola madhimoni. A van’wani i no famba navo a cikhati leci a nga kari a chumayela hi dhoropa ni dhoropa, ni lomu zvidhoropaneni. Jesu ni vapizani vakwe va wa hlayisiwa hi vavasati vo tala vo tsumbeka, vo kota Mariya Magdhala, Johana, Suzana ni van’wani.

Loku Jesu a gondzisile vapizani vakwe, i no va ruma va ya chumayela. Laha va nga kari va fambafamba lomu Galileya va chumayela, a vanhu van’wani vo tala va no maha vapizani, va bhabhatiswa. Ku wa hi ni vanhu vo tala va nga lava kuva vapizani laha ka kuza Jesu a va fananisa ni simu gi nga ni timbewu ti lavako ku tshovelwa. I te: ‘Kombelani Jehovha lezvaku a rumela vatiri van’wani kasi va ta tshovela timbewu’.  Hi ndzhako ka cikhati, i no hlawula 70 cikari ka vapizani vakwe a va ruma hi vambiri vambiri va ya chumayela lomu Judhiya. Va wa gondzisa vanhu va zviyimo zvontlhe xungetano hi Mufumo wa Nungungulu. A vapizani va Jesu va no wuya na va tsakile nguvhu na va lava ku ya byela Jesu lezvi zvi nga humelela. Ku wa nga hi na nchumu lowu Sathani a nga wa ta wu maha kasi ku nyimisa ntiro wa kuchumayela.

Jesu i no maha zvontlhe zvi nga laveka kasi loku a tlhela tilweni, a vapizani vakwe va zvi kota ku simama va maha a ntiro lowu wa lisima. I no va byela lezvi: ‘Chumayelani mahungu yo saseka misaveni yontlhe. Gondzisani vanhu a Mhaka ya Nungungulu, mu tlhela mu va bhabhatisa’.