Ni cihi leci a vaFarisi va nga kari va ci maha, va wa mahela ku woniwa. Loku va maha nchumu wa wu nene, va wa fela ku a van’wani va zvi wona. Va wa maha mikombelo lomu ko tala vanhu kasi va woniwa. A vaFarisi va wa tiva mikombelo yo leha hi hloko va tlhela va yi phindaphinda lomu va nga khozela kona ni lomu a maruwa ma tlhanganako kona kasi va zwiwa hi van’wani. Hikwalaho, a vanhu va no hlamala a cikhati leci Jesu a ngaku: ‘Mu nga mahi mikombelo a ku fana ni vaFarisi. Va alakanya lezvaku Nungungulu i tsakisiwa hi magezu yabye yo tala. Kanilezvi, a ma mu tsakisi. Loku u maha mukombelo, zva wena na Jehovha basi. U nga phindaphindi magezu yalawa ya man’we. Jehovha i lava lezvaku u mu byela lezvi u ti zwisako zvona lomu mbilwini.

 ‘A mukombelo mu fanele ku wu mahisa lezvi: “Papayi wa hina le tilweni, a vito ga wena a gi basiswe. A Mufumo wa wena a wute. A kurandza ka wena a ku mahiwe laha misaveni ni le tilweni”’. Jesu i va gondzisile lezvaku va kombelela ku kuma zvakuga zva siku ni siku kambe, va tsetselelwa zviwonho zvabye ni zvilo zvin’wani zvi yelanako na vona.

Jesu i te: ‘Mu nga tshuki mu tsika ku maha mukombelo. Simamani ku kombela zvilo zva zvi nene ka Jehovha, a Papayi wa n’wina. A vapswali vontlhe va lava ku va nyika zva zvi nene a vana vabye. Loku a n’wana wa wena a ku kombela pawa, u nga mu nyika ribye ke? Loku a ku kombela njhanjhi, u nga mu nyika nyoka ke’?

Andzhako ka lezvo, Jesu i no tlhamusela lezvi a nga lava ku va gondzisa. I te: ‘Lezvi n’wina mu zvi tivako ku va nyika zva zvi nene a vana va n’wina, zvi komba ku a Papayi wa n’wina Jehovha, i ta maha zvo hundza lezvo; i ta mu nyika moya wa ku basa. Lezvi zvi lavekako, ku kombela basi’. Wa maha lezvi Jesu a nga wula ke? Zvini u wulako lomu ka mikombelo ya wena?