Jesu i wa hi ni vanghana a nga kari a va randza nguvhu va nga tshama le Bhetaniya. Ku wa hi Lazaru ni vamakabye vakwe Mariya na Marta. Ka siku go kari Jesu na a hi le Pereya, Mariya na Marta va no rumela mahungu ya cihatla ka Jesu, yaku: ‘Lazaru wa babya nguvhu. Ngone hi kuhatlisa’. Jesu a nga tekelangi ku famba. Kanilezvi, i no mbheta masiku mambiri na a nga se famba. Ndzeni ka masiku lawo, Lazaru i nofa zvonake Jesu a byela vapizani vakwe aku: ‘A hi fambeni Bhetaniya. Lazaru i etlele. Ndziya ndzi ya mu vhuxa’. A vapostoli va no mu byela lezvi: ‘Loku Lazaru a etlele zvi nene. Zvi ta mu vhuna ku kalamuka’.

A cikhati leci Jesu a nga chikela le Bhetaniya ku wa hundza 4 wa masiku Lazaru na a lahlilwe. Ku wa hi ni vanhu vo tala va nga ta chavelela Marta na Mariya. A cikhati leci Marta a ngazwa lezvaku Jesu wa chikela, i no tsutsuma a mu khinga, a yaku: ‘Hosi, loku u wa hi kona laha, a makabye wa mina na a nga fangi.’ Jesu aku: ‘A makabye wa wena i ta vhuka. Marta, wa zvi kholwa lezvo ke’? Marta aku: ‘Ndza kholwa ku i ta vhuka cikhatini ci tako’. Jesu aku: ‘Mina ndzi kuvhuka ni wutomi.’

Marta i noya ka Mariya a ya mu byela lezvi: ‘Jesu i chikele’. Mariya i no tsutsuma aya ka Jesu zvonake a vanhu va se mu landza. I no yawa laha mikondzweni yakwe a rila. Ne i wa nga zvi koti ku miyela. I no byela Jesu aku: ‘Hosi, loku u wa hi kona laha, a makabye wa hina na a ha hanya’! Jesu i no wona lezvi Mariya a nga xanisekisa zvona a se sangula ku rila na yenawu. A cikhati leci a vanhu va nga mu wona na a rila, va te: ‘Hi nga wonani lezvi Jesu a nga mu randzisa zvona Lazaru’! Kanilezvi, a van’wani va no karateka vaku: ‘Hikuyini a nga kala ku hanyisa munghana wakwe’? Zvini lezvi Jesu a nga maha?

I noya laha cilahleni ci nga vhalilwe hi ribye ga hombe. I no va ruma, aku: ‘Susani ribye.’ Marta aku: ‘Ku hundza 4 wa masiku na a file! A miri wakwe wa nuha’! Hambulezvo, va no susa ribye zvonake Jesu a maha mukombelo, aku: ‘Papayi, ndza ku bonga hi lezvi u zwako mikombelo ya mina. Ndza zvi tiva ku contlhe cikhati wa yizwa. Kanilezvi, ndzi wulawula zvi zwala kasi a vanhu lava va zvi tiva ku hi wena u nga ndzi ruma’. I no gumesa a vitana hi gezu ga hombe, aku: “Lazaru, huma!” Ku no maheka  nchumu wo hlamalisa. Lazaru i no huma hi lomu cilahleni, na a ha tsondzelelwe tinguwo. Jesu aku: ‘Mu tlhatlheleleni mu mu tsika a famba’.

A vanhu vo tala va nga wona lezvi zvi nga maheka, va no kholwa ka Jesu. Kanilezvi, a van’wani va no ya byela vaFarisi. Kusukela kwalaho, a vaFarisi va no zama ku daya Lazaru na Jesu. A mun’we wa vapostoli vakwe va 12 i no ngungumela a ya wutisa vaFarisi aku: ‘Mu ta ndzi nyika mali muni loku ndzi mu vhuna ku khoma Jesu’? Va no mu byela ku hi ta ku nyika 30 wa zvingerengere zva silivha. Judhasi i no vhumela zvonake a sangula ku lavetela tindlela ta ku nyikela Jesu ka vaFarisi kasi va mu daya.