Johani i wa kari a chumayela aku: ‘Kuta munhu wa hombe ku hundza mina’. A cikhati leci Jesu a nga hi ni 30 wa malembe, i no suka le Galileya aya Congweni wa Jordhani, laha Johani a nga kari a bhabhatisa kona vanhu. Jesu i wa lava lezvaku Johani a mu bhabhatisa. Kanilezvi, Johani i no byela Jesu aku: ‘A ndzi ringanelwi hi ku ku bhabhatisa. Wena hi wena u faneleko ku bhabhatisa mina’. Jesu aku: ‘Jehovha i lava lezvaku wena u bhabhatisa mina’. Hikwalaho, va noya lomu Congweni wa Jordhani zvonake Johani a ya peta miri wa Jesu wontlhe lomu matini — a mu bhabhatisa.

Loku Jesu a humile hi lomu matini, i no maha mukombelo. Ka cikhati caleco, a tilo gi no vhululeka zvonake a moya wa Nungungulu wu relela wuta ka yena na wu fana ni tuva. Jehovha i no wulawula hi le tilweni aku: ‘Wena u N’wana wa mina ndzi mu randzako. Ndza xalala nguvhu hi wena’.

A cikhati leci a moya wa Jehovha wu ngata hehla ka Jesu, i nova Kristu, ku nga Mesiya. Kota Mesiya, i wa ta sangula ku maha ntiro lowu Jehovha a nga mu rumela ku a ta maha laha misaveni.

Zvalezvi Jesu a nga bhabhatiswa, i noya ciwuleni a ya mbheta 40 wa masiku. A cikhati leci a nga wuya, i noya wonana na Johani. Laha Johani a nga wona Jesu, i te: ‘Leyi i Yivhana ya Nungungulu, leyi yi to tirisiwa kasi ku tsetselela zviwonho zva tiko gontlhe’. Hi magezu lawo, Johani i wo komba vanhu lezvaku Jesu hi yena Mesiya. Wa zvi tiva ku zvini zvi nga humelela Jesu a cikhati leci a nga hi ciwuleni? A hi zvi wone.