Ka khati go kari na ko kiyela masiku matsongwani kasi vaga Phasika ga lembe ga 32 Nguveni ya Hina, a vapostoli va no wuya hi kuchumayeleni. Va wa karele nguvhu. Hikwalaho, Jesu i no famba navo hi ngalava vaya Bhetsaidha kasi va ya humula. Kanilezvi, laha a ngalava yi nga hi kusuhani ni ku chikela le handle ka mati, Jesu i no wona lezvaku ku ni vanhu vo tala va nga va landzile. Hambu lezvi Jesu a nga lava ku tshama ni vapizani vakwe basi, i va amukele khwatsi a vanhu lavo. I no hanyisa vababyi la’va nga hi kona a tlhela a sangula ku va gondzisa. I no mbheta siku gontlhe na a va gondzisa xungetano hi Mufumo wa Nungungulu. A cikhati leci gi nga sangula ku phuma, a vapizani vakwe va nota va taku: ‘A vanhu vazwa ndlala. Va tsiki va famba kasi va ya ti lavela zvakuga’.

Jesu aku: ‘Mu nga va tsiki va famba. Va nyikeni zvakuga’. A vapostoli va mu wutisa lezvi: ‘U lava ku hiya va xavela tipawa ke’? Filipu, a mun’we wa vapostoli, aku: ‘Hambu a tipawa ta 200 wa macheleni, ti wa nga ta ringana ku nyika vanhu lava vaga va xura’.

Jesu a va wutisa aku: ‘A zvakuga mu nga nazvo zvi tele ku kota kwihi’? Andrewu aku: ‘Hova ni 5 wa tipawa ni zvinjhanjhana zvimbiri basi. Lezvo ne a zvi phahi nchumu’. Jesu aku: ‘Ndzi nyiketeni a tipawa ni tinjhanjhi leto’. I no byela vanhu lezvaku va tshama hi mitlawa ya 50 ni 100 wa vona. Jesu i no teka tipawa ni tinjhanjhi, a cuwuka tilweni zvonake a maha mukombelo. I no gumesa a teka zvakuga lezvo a nyika vapostoli vakwe zvonake va phakela vanhu. Ku noga 5000 wa vavanuna, vavasati ni vanana kala va  xura. Va no gumesa va patsa lezvi zvi nga sele kasi ku nga hoxiwi nchumu. Lezvi zvi nga sele zvi no tata 12 wa zvirundzu kutani zvindzala! Leco cive cihlamaliso ca hombe, a hi zvona?

A vanhu va no tsaka nguvhu laha ka kuza va lava ku Jesu a maha hosi yabye. Kanilezvi, Jesu i wa zvi tiva lezvaku ci wa nga se chikela a cikhati leci Jehovha a lavako ku a maha hosi. Hikwalaho, i no byela vanhu lezvaku va famba — a vapostoli vakwe a va byela va tsemakanya Bimbi ga Galileya. A vapostoli va no nghena lomu ngalaveni zvonake Jesu aya le citsungeni yece. Hikuyini? I wa lava cikhati ca ku bhula ni Papayi wakwe hi mukombelo. Kani i wa hi ni ntiro wo tala ku kota kwihi, Jesu i wa randza ku ti nyika cikhati ca ku maha mukombelo.