Loku Jesu a bhabhatisilwe, a moya wa ku basa wu no mu yisa ciwuleni. I no ya tshama 40 wa masiku na a ngagi nchumu, zvonake azwa ndlala ya hombe. Sathani i no gumesa a ta ringa Jesu, a mu byela lezvi: ‘Loku u hi N’wana wa Nungungulu, byela maribye lawa lezvaku ma maha tipawa’. Kanilezvi Jesu i no hlamula hi ku tirisa Mitsalo, aku: ‘Ku tsalilwe lezvaku a munhu a nga ta hanya hi pawa basi. I fanele ku ingisa zvontlhe lezvi Jehovha a wulako’.

Hi kulandzela, Sathani i no ringa Jesu, aku: ‘Loku u hi N’wana wa Nungungulu, tlula hi laha hehla ka tempeli leyi uya lahasi. Ku tsalilwe lezvaku Nungungulu i ta ruma tingilozi takwe ti ta ku khamukela’. Kanilezvi, Jesu i no tirisa Mitsalo kambe, aku: ‘Ku tsalilwe lezvaku u nga ringi Jehovha Nungungulu wa wena’.

Sathani i no gumesa a mu komba mifumo yontlhe ya misava ni titshomba ta yona ni wudzundzo ga yona, aku: ‘Loku u ndzi khozela khati gin’we basi, ndzi ta ku nyika mifumo yontlhe leyi ni wudzundzo ga yona’. Kanilezvi Jesu i te: ‘Suka Sathani! Ku tsalilwe lezvaku u fanele ku khozela Jehovha basi’.

Sathani i no gumesa a famba, zvonake kuta tingilozi ti ta vhuna Jesu. Kusukela kwalaho, Jesu i no sangula ku chumayela mahungu yo saseka ya Mufumo wa Nungungulu. Wu wa hi ntiro lowu a nga rumelwe ku ta tira laha misaveni. A vanhu va wa zvi randza lezvi Jesu a nga kari a va gondzisa, niku va wa mu landzela kontlhe lomu a ngaya kona.