Ka siku go kari andzhako ka Phasika, Jesu ni vapizani vakwe va no tsemakanya hi lomu Samaria na va tlhela ku ya Galileya. Kusuhani ni dhoropa ga Sikari, Jesu i no nyima ka wutshamu gi nga vitaniwa ku i hlowo ya Jakobe. A cikhati leci a nga kari a humula, a vapizani vakwe va noya dhoropeni va ya xava zvakuga.

Ku nota wasati laha hloweni a takha mati. Jesu i no mu byela lezvi: ‘Ndzi kombela ku ndzi nyika ya kunwa’. A wasati loye, aku: ‘Hikuyini u wulawulako na mina? Phela mina ndzi muSamariya. A wu zvi tivi ku a vaJudha a va wulawuli ni vaSamariya’? Jesu aku: ‘Loku u wo zvi tiva ku hi mina mani, u wa ta ndzi kombela zvakunwa, ndzi ku nyika mati ma nyikako wutomi’. A wasati loye aku: ‘U lava ku wula yini? Ne a wu na ca kukha hi cona’. Jesu aku: ‘Loyi a nwako mati ndzi mu nyikako, a nga ta tshuka azwa tora kambe’. A wasati loye aku: ‘Hosi, ndzi nyike mati lawo’.

Jesu i no mu byela lezvi: ‘Famba u ya teka nuna wa wena, u wuya naye laha hloweni’. A wasati aku: ‘A ndzi na nuna.’ Jesu aku: ‘A wu hembi. U hanyile ni 5 wa vavanuna. Ni yaloyi u nga naye zvezvi a hi nuna wa wena’. A wasati aku: ‘Ndza zvi wona lezvaku u muphrofeti. Hina vaSamariya hi kholwa lezvaku hi fanele ku khozela Nungungulu laha ka citsunga leci. Kanilezvi, a vaJudha vali hi fanele ku mu khozela le Jerusalema basi. Ndza kholwa lezvaku a cikhati leci Mesiya a tota, i ta hi gondzisa lezvi hi faneleko ku khozelisa zvona’. Jesu i no gumesa a wula zvilo zva ku i wa nga se tshuka a byela munhu, aku: ‘Mina, hi mina Mesiya’.

 A wasati i no hatlisa aya dhoropeni gabye a ya byela vaSamariya aku: ‘Ko khwatsi ndzi kumile Mesiya. I tiva zvontlhe zva wutomi ga mina. A hi fambeni mu ya mu wona’! Va no famba naye le hloweni va ya ingisela Jesu na a kari a gondzisa.

A vaSamariya va no ramba Jesu lezvaku a tshama lomu dhoropeni gabye. I no mbheta masiku mambiri na a va gondzisa, zvonake a vanhu vo tala va no kholwa ka yena. Va no byela a wasati wa muSamaria vaku: ‘Lezvi hi mu ingiseleko wanuna loyi, ha zvi wona lezvaku hakunene loyi muhanyisi wa tiko’.