Jesu ni vapostoli vakwe va no famba hi lomu nkoveni wa Kidroni vaya Citsungeni ca maOlivha. Makunu ku wa hi phindzulani, niku a hweti yi wa woneka yontlhe. Loku va chikele le sin’wini ga Getsemane, Jesu i no va byela lezvi: ‘Salani laha, mu nga etleli’. Jesu i no famba a engetela ku nghenanyana lomu sin’wini zvonake a ya khizama. I no maha mukombelo ka Jehovha na a karatekile nguvhu, aku: ‘Jehovha, a ku maheke kurandza ka wena’. Jehovha i no rumela ngilozi yi ta mu tiyisa. Loku Jesu a tlhela ka vapostoli vakwe, i no va kuma na va etlele. Aku: ‘Vhukani! Leci a hi cikhati ca ku mu nga etlela! Ci chikele cikhati ca ku ndzi nyikelwa ka valala va mina’.

Zvalezvo, Judhasi i no chikela na a hi ni vanhu vo tala nguvhu va nga hi ni zvipadha ni zvigomba. I wa ku tiva lomu Jesu a nga hi kona hakuva va wa tolovela kuya ka simu legi. Judhasi i wa byelile masochwa lezvaku i wa ta va komba Jesu. I no tekela ku kongoma Jesu a yaku: ‘Xewe Mugondzisi’ zvonake a mu pswopswa. Jesu aku: ‘Judhasi, wo ndzi nyikela kasi ndzi dawa hi ku ndzi pswopswa ke’?

Jesu i no tshinela a wutisa vanhu aku: ‘Mu lava mani?’ Vaku: ‘Hi lava Jesu wa le Nazareta’. A hlamula aku: ‘Hi mina loyi.’ A vavanuna lavo va no hlehla vawa lahasi. Jesu i no va wutisa kambe aku: ‘Kasi mu lava mani’? Va phinda kambe vaku: ‘Hi lava Jesu wa le Nazareta’. Jesu a hlamula aku: ‘Ndzi mu byelile ndziku hi mina. Tsikani vapizani va mina va famba’.

A cikhati leci Pedro a nga zvi zwisisa lezvi zvi nga kari zvi maheka, i no hlomula cipadha a tsema ndleve ya wanuna wa ku hi Malkusi, a nga hi mutiri wa mupristi wa hombe. Kanilezvi, Jesu i no khumba ndleve ya wanuna loye a mu hanyisa; a guma a byela Pedro aku: ‘Tlhelisa a cipadha ca wena. Loku ulwa hi cipadha, u ta dawa hi  cipadha’. A masochwa ma no khoma Jesu ma mu boha mawoko, a vapostoli va tsutsuma. A vanhu va no famba na Jesu kaya ka Anasi, a murangeli wa vapristi. Anasi i no mu maha zviwutiso zvo hlaya zvonake a mu rumela ka Kayafasi, a Mupristi wa Hombe. Kanilezvi, zvini zvi nga humelela vapostoli?