Loku Jesu a file, a wanuna wo ganya wa ku hi Josefa i no kombela Pilatu lezvaku a mu tsika a ya chisa cirumbi ca Jesu laha mhandzeni. Josefa i no phutsela cirumbi ca Jesu hi tinguwo to basa, a ci cheletela zvilo zvo nuhelisa zvonake a ya ci lahla lomu ka cilahla ca ciswa. I no wumbuluta ribye go bindza a vhala hi gona laha nyangweni ya cilahla. A vapristi va hombe va no byela Pilatu vaku: ‘Ha chava ku a vapizani va Jesu va ta teka cirumbi cakwe va gumesa vaku i vhukile’. Hikwalaho, Pilatu i no va byela lezvi: ‘Vhalani cilahla ci tiya mu tlhela mu veka munhu a maha guarda’.

Loku ku hundzile masiku manharu, a vavasati vo kari va noya laha cilahleni ni mixo. Va no ya kuma lezvaku a ribye gi nga vhalile nyangwa ya cilahla gi susilwe. Lomu ndzeni ka cilahla ku wa hi ni ngilozi, zvonake yi byela vavasati lavo yiku: ‘Mu nga chavi. Jesu i vhuxilwe. Fambani mu ya byela vapizani vakwe va ya kumana naye le Galileya’.

Laha a ngilozi yi nga kari yi va byela lezvo, Mariya Magdhala i no hatlisa a ya lavetela Pedro na Johani. A va byela lezvi: ‘I kona a nga teka cirumbi ca Jesu’! Pedro na Johani va no tsutsuma va ya cilahleni. Loku va chikele, va no wona lezvaku lomu cilahleni ku wa nga hi na nchumu, zvonake va tlhela mitini yabye.

Loku Mariya a tlhelile, i no wona tingilozi timbiri lomu ndzeni ka cilahla zvonake a ti byela lezvi: ‘Va susile Hosi ya mina. Ne a ndzi zvi tivi ku va yi vekile kwihi’. I no wona wanuna wo kari, a pimisa lezvaku hi wanuna loyi wa ku wonelela cilahla, zvonake aku: ‘Bavo, ndzi kombela u ndzi byela ku u mu vekile kwihi’. Kanilezvi, a cikhati leci a wanuna loye a ngaku: “Mariya!” i no tekela ku mu tiva ku hi Jesu. Mariya aku: “Mugondzisi”! zvonake a mu bharasara. Jesu aku: ‘Famba u ya byela vamakabye va mina lezvaku u ndzi wonile’. Mariya i no tekela ku tsutsuma a ya ka vapizani vakwe a ya va byela ku i wonile Jesu.

Ni gambo ga kona, a vapizani vambiri va Jesu va no kumana ni wanuna wo kari laha ndleleni na vata hi le Jerusalema vaya Emawusi. A wanuna loye i no longoloka navo zvonake a va wutisa ku zvini va nga kari va bhula hi zvona. Va mu hlamula vaku: ‘A wu zvi tivangi ku ka masiku manharu ma hundzileko, a vapristi va hombe va dayile Jesu? Zvezvi a vavasati vo kari vali Jesu wa hanya’! A wanuna loye i no va wutisa lezvi:  ‘A mu kholwi lezvi zvi nga wuliwa hi vaphrofeti ke? A vaphrofeti va te Kristu i wa ta dawa a tlhela a vhuxiwa hi ka vafileko’. A wanuna loye i no simama ku va tlhamusela mitsalo. A cikhati leci va nga chikela le Emawusi, a vapizani va no kombela wanuna loye lezvaku a nghena navo. A cikhati leci a nga kombelela pawa kasi vaga, va no tekela ku zvi pola a ku hi Jesu. Jesu a se nyamalala.

A vapizani lava va vambiri va no hatlisa va ya Jerusalema lomu a vapostoli va nga tlhangene kona, va ya va byela lezvi zvi nga maheka. Laha va nga hi zvin’we kwalomo ndlwini, Jesu i no woneka ka vontlhe. A vapostoli a va tekelangi ku kholwa ku hi yena Jesu. Jesu i no va byela lezvi: ‘Cuwukani mandla ya mina. Hi lawa! Ringetelani mu mazwa. Ku tsalilwe ku Kristu i wa ta vhuka hi ka vafileko’.