A cikhati leci Jesu a nga hi ni vapostoli vakwe lomu ndlwini ya lehehla, i va byelile lezvi: ‘Inyamutlha a wusiku legi, n’wentlhe mu ta tsutsuma mu ndzi siya ndzoce’. Pedro i te: ‘Mina ne! Hambu loku lava van’wani va ku siya, mina ndzi nga ta ku siya’. Kanilezvi, Jesu i no byela Pedro aku: ‘A nkuku na wu nga seba, u ta ala makhati manharu uku a wu ndzi tivi’.

A cikhati leci a masochwa ma nga teka Jesu ma famba naye kaya ka Kayafasi, a kutala ka vapostoli va wa tsutsumile. Kanilezvi, a vambiri va wa mu landzile hi laha ndzhako na va hi lomu cikari ka vanhu. A mun’we wabye ku wa hi Pedro. I noya nghena lomu tsendzeleni wa yindlu ya Kayafasi a wora ndzilo. A cikhati leci a nga hi laha ko wonekela, a mutiri wo kari wa cisati i no wona Pedro zvonake aku: ‘Wena ndza ku tiva! Wenawu u wa hi na Jesu’! Pedro i no hlamula aku: ‘Ahihi, ndzi wa nga hi na yena! Kona zvini zvezvo u wulawulako’!

I no famba a kongoma le Nyangweni. Kanilezvi, i no woniwa kambe hi mutiri mun’wani wa cisati zvonake a byela vanhu aku: ‘A wanuna loyi i wa hi na Jesu’! Pedro aku: ‘Ne a ndzi mu tivi Jesu wa kona’! A wanuna wo kari aku: ‘Ma tivana sa! Ndzizwa hi mawulawulela ya wena. Wenawu u wa le Galileya a ku fana na Jesu’. Kanilezvi, Pedro i no hlambanya aku: ‘A ndzi mu tivi Jesu mina’!

Ka cikhati leco, ku noba nkuku zvonake Pedro a wona Jesu na a hundzuluka a mu cuwuka. I no alakanya magezu ya Jesu zvonake a bayiseka nguvhu a huma le handle a rila.

Ndzeni ka cikhati leco, a madhota lomu ndlwini ya Kayafasi ma no boha cikungo ca ku xuxa Jesu. Ma wa mahile ciboho ca ku daya Jesu. Makunu va wo lavetela nandzu wa kona. Kanilezvi, va wa nga kumi nchumu wa ku mu nyika hi wona nandzu. Kayafasi i no gumesa a wutisa Jesu hi kukongoma aku: ‘Wena u N’wana wa Nungungulu ke’? Jesu aku: ‘Ina’. Kayafasi aku: ‘A ha ha lavi cigelo cin’wani. I rukatele’! A madhota wontlhe ma no vhumela maku: ‘A wanuna loyi i fanele ku dawa’.  Va no mu phelela, va muba tipama, va mu vhala matihlo, va muba hi zvigomba, vaku: ‘Loku u hi muphrofeti, hi byele ku himani a nga kuba’!

Loku gi cile, va no mu teka va famba naye lomu a madhota ma nga tolovela ku tlhangana kona va ya mu wutisa kambe vaku: ‘U N’wana wa Nungungulu wena ke’? Jesu a hlamula aku: ‘Mo wula zvezvo muku ndzi N’wana wa Nungungulu’. Va no mu nyika nandzu vaku wa rukatela zvonake va mu teka va famba naye ka Pontiyu Pilatu, a mufumeli wa muRoma. Zvini zvi nga maheka hi kulandzela? A hi zvi wone.