Ku wa hi ni wanuna wo kari a nga kala a nga zvi koti ku famba, loyi a nga kari a tshama laha nyangweni ya tempeli a kombela zomola siku ni siku. Ni gambo go kari, i no wona Pedro na Johani na vaya lomu tempeleni. I no va byela lezvi: ‘Ndzi kombela zomola’. Pedro aku: ‘Ndzi lava ku ku nyika nchumu wa wu nene nguvhu a ku hundza mali. Hi vito ga Jesu, suka u yima u tlhela u famba’! Pedro i no mu vhuna ku suka a yima, zvonake a wanuna loye a sangula ku famba! A vanhu va no tsaka nguvhu hi cihlamaliso leci laha ka kuza ni van’wani votala va kholwa ka Jesu.

Kanilezvi a vapristi ni vaSadhusi va no zangara. Va no khoma vapostoli vaya navo lomu va nga xuxisa kona vanhu zvonake va yaku: ‘Himani a nga mu nyika ntamu wa ku hanyisa wanuna loyi’? Pedro aku: ‘Hi Jesu Kristu loyi n’wina mu nga mu daya’. A varangeli va wukhongeli va no banguleka vaku: ‘Tsikani ku wulawula hi Jesu!’ Kanilezvi a vapostoli va no hlamula vaku: ‘Hi nga ta tsika. Hi fanele ku wulawula hi yena’.

Zvalezvi Pedro na Johani va nga tsikiwa va famba, va noya ka vapizani lava van’wani va ya va hlawutela lezvi zvi nga maheka. Va no maha mukombelo ka Jehovha na va hi zvin’we vaku: ‘Jehovha, hi kombela ku u hi tiyisa hlana kasi hi zvi kota ku simama hi maha ntiro wa wena’. Jehovha i no va nyika moya wa ku basa zvonake va simama ku chumayela ni ku hanyisa vababyi. Ku no simama ku engetela vanhu van’wani vo tala, va kholwa ka Jesu. A vaSadhusi va no va zonda nguvhu a vapostoli laha ka kuza va va khoma va va vhalela paxweni. Kanilezvi, ni wusiku ga kona, Jehovha i no rumela ngilozi yi ya vhulula tivati ta paxo, yi byela vapostoli yiku: ‘Tlhelani lomu tempeleni mu ya gondzisa’.

Ni mixo ya kona, a tihosana ni varangeli va wukhongeli va no byeliwa lezvi: ‘A paxo ga ha khotsilwe. Kanilezvi a vavanuna lava mu nga va vhalele va humile! Zvezvi va lomu tempeleni va gondzisa vanhu’! A vapostoli va no khomiwa kambe va yisiwa ndlwini ya ku xuxisa kona. Mupristi wa hombe aku: ‘A mu zvi alakanyi  a ku hi mu nyikile nayo wa ku mu nga ha wulawuli kambe hi Jesu ke’? Pedro i no hlamula aku: ‘Hi fanele ku ingisa Nungungulu kota hosi ku hundza ku ingisa vanhu’.

A varangeli va wukhongeli va no zangara nguvhu laha ka kuza va lava ku daya vapostoli. Kanilezvi a muFarisi wa ku hi Gamaliyeli i no suka a yima, aku: ‘Ti woneleni! Kuzvilava a vavanuna lava va vhuniwa hi Nungungulu. Mu lava kulwa na Nungungulu futsi’? Va no ingisa wusungukati gakwe. Va no vaba va tlhela va va byela kambe lezvaku va wa fanele ku tsika ku chumayela, zvonake va va tsika va famba. Kanilezvi, a vapizani va Jesu a va tsikangi ku chumayela hi kota ya lezvo. Va no simama ku chumayela mahungu yo saseka — lomu tempeleni ni hi muti ni muti — na va nga chavi nchumu.