Le Filipi ku wa hi ni citiri ca nhanyana ci nga hi ni dhimoni. A nhanyana loye i wa hlahluva hi ku vhuniwa hi dhimoni lego. Lava a nga tira ka vona, va wa kuma mali yo tala nguvhu hi ntiro lowu wa kuhlahluva. A cikhati leci Pawule na Silasi va ngaya le dhoropeni ga Filipi, a nhanyana loye i no va landzisela hi masiku yo tala. A dhimoni gi wa mu maha a banguleka aku: ‘A vavanuna lava va tirela Nungungulu a Hundzeleleko Kutlakuka’. Hi kugumesa, Pawule i no byela dhimoni lego aku: ‘Hi vito ga Jesu, suka laha ka nhanyana loyi’! A dhimoni gi no suka.

A cikhati leci lava a nga tira ka vona va nga wona lezvaku va wa nga ta ha maha mali hi yena, va no zangara nguvhu. Va no khoma Pawule na Silasi va va yisa ka tihosana, va yaku: ‘A vavanuna lava a va ingisi a nayo, niku a dhoropa gontlhe ga karateka’! A tihosana ti no ruma vanhu lezvaku vaba Pawule na Silasi va tlhela va va vhalela paxweni. A guarda ga paxo gi no va peta ka wutshamu go eta nguvhu ni ga munyama ga paxo gi tlhela gi va bohelela laha ka mapulangu.

Pawule na Silasi va no yimbelela tisimu va dhumisa Jehovha, a zvibochwa lezvi zvin’wani na zvi kari zvi ingisela. Laha cikari ka wusiku, ku nova ni kutsekatseka ka hombe ka misava hi citshuketi, a paxo gi tsekatseka kusukela hehla kala hasi. A tivati ta paxo ti no vhululeka, a machini ya zvibochwa ma tlhatlheka ni mapulangu lawa va nga va fasele ma suka. A guarda gi no tsutsuma gi ya paxweni gi ya kuma lezvaku a tivati ti vhululekile. Gi no teka cipadha gi lava ku ti daya, hi ku pimisa lezvaku a zvibochwa zvontlhe zvi humile zvi tsutsuma.

Pawule i no tekela ku mu byela lezvi: ‘U nga ti dayi sa! Hontlheni hi kona’! A guarda gi no tsutsuma gi ya khizamela Pawule na Silasi, gi va wutisa lezvi: ‘Cini ndzi faneleko ku maha kasi ndzi hanyiswa’? Va no mu byela lezvi: ‘Wena ni va ngango wa wena mu fanele ku kholwa ka Jesu’. Pawule na Silasi va no gumesa va va gondzisa a mhaka ya Jehovha, zvonake a guarda lego ni vontlhe va laha ngangweni wa gona va no bhabhatiswa.