Sawule i wa hi muRoma a nga pswaliwa le Tarsusi. I wa hi muFarisi a nga wu tiva khwatsi a Nayo wa ciJudha, niku i wa ma zonda nguvhu a maKristu. I wa khomela vavanuna ni vavasati va maKristu lomu mitini yabye, a ya va vhalela paxweni. A cikhati leci a vanhu va xapi va nga kari va daya mupizani Stefani hi maribye, i wa hi kona kambe a cuwukisela.

Sawule i wa nga tsaki hi ku khomela maKristu ya lomu Jerusalema basi. I noya ka mupristi wa hombe a ya kombela lezvaku a mu ruma le dhoropeni ga Dhamasku kasi a ya khomela maKristu ya seyo. A cikhati leci Sawule a nga kari a chikela le Dhamasku, i no wona kungangamela hi citshuketi, ku woninga kontlhe laha a nga hi kona zvonake awa lahasi. I nozwa gezu giku: ‘Sawule, hikuyini u ndzi xanisako’? Sawule i no wutisa aku: ‘Hi wena mani’? A gezu gi hlamula giku: ‘Hi mina Jesu. Nghena lomu Dhamasku. U ta ya byeliwa lezvi u faneleko ku maha’. Sawule i wa file mahlo hi citshuketi, a tsandzeka ku wona. Hikwalaho, va no mu khometela hi woko kasi a nghena lomu dhoropeni ga Dhamasku.

Lomu Dhamasku ku wa hi ni muKristu wo tsumbeka wa ku hi Ananiyasi. Jesu i no byela Ananiyasi hi lomu ka muwoniso, aku: ‘Famba ndlwini ya Judha, yi nga laha ruweni gi vitaniwako ku Go Lulama, u ya lava Sawule’. Ananiyasi aku: ‘Hosi, ndza zvi tiva zvontlhe zvi mahiwako hi wanuna loyi! I khomela vapizani va wena a va vhalela lomu mapaxweni’! Kanilezvi Jesu aku: ‘Famba ka Sawule. Ndzi mu langile lezvaku a chumayela mahungu yo saseka ka vanhu va matiko yo tala’.

Ananiyasi i no ya kumana na Sawule, a mu byela lezvi: ‘Sawule makabye wa mina, Jesu i ndzi rumile ku ta ku vhulula mahlo’. Sawule i no tekela ku vhululeka mahlo, a sangula ku wona. I no gondza xungetano hi Jesu, a sangula ku mu landzela. Lezvi makunu a nga bhabhatisilwe kota muKristu, Sawule i no sangula ku chumayela lomu masinagogeni na a hi zvin’we  ni valandzeli van’wani va Kristu. U alakanya lezvaku a vaJudha va ti zwisile kuyini a cikhati va nga wona Sawule na a gondzisa vanhu xungetano hi Jesu? Va no karateka nguvhu vaku: ‘A hi yena wanuna loyi a nga kari a khomela vapizani va Jesu ke’?

Sawule i no tshama malembe manharu lomu Dhamasku a chumayela vanhu. A vaJudha va wa mu zonda Sawule. Hikwalaho, va no maha makungo ya ku mu daya. Kanilezvi a vamakabye va no zvi tiva va gumesa va vhuna Sawule kasi a nga dawi. Va no mu nghenisa lomu ka cirundzu va mu releta lahasi hi laha ka muru wa dhoropa.

A cikhati leci Sawule a ngaya le Jerusalema, i no zama ku tlhangana ni vamakabye. Kanilezvi va wa mu chava. A mupizani wo kari wa mu nene wa ku hi Bharnabhasi i no famba na Sawule ka vapostoli a tlhela a va kholwisa lezvaku Sawule i cicile futsi. Sawule i no sangula ku chumayela mahungu yo saseka ni bandla ga le Jerusalema hi kuhiseka. Hi ndzhako ka cikhati, i no tiviwa kota Pawule.