A vapostoli va ingisile lezvi Jesu a nga va ruma, ku nga ku chumayela mahungu yo saseka misaveni yontlhe. Hi lembe ga 47 Nguveni ya Hina, a vamakabye le Antiokiya va no ruma Pawule na Bharnabhasi lezvaku va endza va famba va chumayela. A vachumayeli lava vo hiseka va fambafambile lomu tikweni gontlhe ga Aziya wa Mutsongwani (lomu nyamutlha ku nga tiko ga Turquiya), va chumayela ka matshamu yo kota Dherbhe, Listra ni Ikoniyume.

Pawule na Bharnabhasi va chumayele vanhu vontlhe — lava vo ganya ni zvisiwana, lava va hombe ni la’ va vatsongwani. A vanhu vo tala va no amukela lisine xungetano hi Kristu. A cikhati leci Pawule na Bharnabhasi va nga chumayela Serjiu Pawulusi, a hosi ya Kupero, ku no humelela muloyi wo kari a zama ku va tsikisa ku chumayela. Pawule i no byela muloyi loye aku: ‘Jehovha i ta ku tsayisa’. A muloyi loye i no tekela kufa mahlo, a nga ha woni. A cikhati leci Serjiu Pawulusi a nga zvi wona, i no kholwa ka Jehovha.

Pawule na Bharnabhasi va no chumayela kontlhe — va famba hi muti ni muti, va chumayela lomu mabazarini, lomu maruweni, ni lomu a vanhu va nga khozela kona. A cikhati leci va nga hanyisa cilima le Listra, lava va nga zvi wona va no alakanya lezvaku Pawule na Bharnabhasi vanungungulu zvonake va zama ku va khozela. Kanilezvi, va no va nyimisa vaku: ‘Khozelani Nungungulu basi! Hina hi vanhu’. Ku nota vaJudha vo kari va ta kucetela vanhu lezvaku va vhukela Pawule. A vanhu va no gandla Pawule hi maribye, va mu kokovisela a ya le handle ka dhoropa va ya mu tsika kwaseyo na va alakanya ku i file. Kanilezvi, Pawule i wa ha hanya! Ku no tekela kuta vamakabye va ta mu teka va tlhela naye lomu dhoropeni. Pawule i no gumesa a tlhela le Antiokiya.

Hi lembe ga 49 Nguveni ya Hina, Pawule i no endza kambe a famba a chumayela. Loku a tlhelile a ya vhuxela vamakabye le Aziya wa Mutsongwani,  i no famba a chumayela ka matiko man’wani ya le kule, le Europa. I noya le Filipi, Tesalonika, Atensi ni ka matshamu man’wani. I no famba na Silasi, Luka ni jaha gin’wani ga ku hi Timote. Va no tira zvin’we va vhulula mabandla va tlhela va ma tiyisa. Pawule i mbhetile lembe ni khihlanya le Korinte na a tiyisa vamakabye. I chumayele, a gondzisa a tlhela a tsala mapapilo a ma rumela ka mabandla yo tala. I wa tira ku maha matenda kambe. Hi kufamba ka cikhati, Pawule i no tlhela le Antiokiya.

Hi lembe ga 52 Nguveni ya Hina, Pawule i no endza kambe hi khati ga wunharu, na a sukela le Aziya wa Mutsongwani. I noya ka matshamu ya le kule nguvhu le N’walungu, a za a ya chikela le Filipi zvonake a relela aya le Korinte. Pawule i mbhetile malembe yo hlaya le Efesusi na a gondzisa, a hanyisa vababyi a tlhela a vhunetela bandla. I wa veka tikanelo kambe siku ni siku lomu ka sala yo kari ya hombe ya cikola. A vanhu vo tala va wa mu ingisela va tlhela va cica mahanyela yabye. Loku makunu Pawule a chumayele matikweni yo tala, i no gumesa aya le Jerusalema.