Jehovha i tsumbisile lezvi: ‘A vanhu va nga ta ha rila, va nga ta hazwa kubayisa, va nga ta ha babya ne va nga ta hafa. Ndzi ta kulula mihloti yontlhe tinghoheni tabye. A zvilo zvontlhe zva kubiha zvi nga ta ha alakanyiwa’.

Jehovha i wa vekile Adhamu na Evha lomu sin’wini ga Edheni kasi va hanya kona hi kurula na va tsakile. Va wa fanele ku khozela Papayi wabye wa le tilweni va tlhela va tata misava hi vana vabye. Adhamu na Evha va no tsika ku ingisa Jehovha. Kanilezvi, lezvi Jehovha a nga lava ku maha kusanguleni a zvi cicangi. Lomu ka bhuku legi, hi wonile lezvaku zvontlhe lezvi Nungungulu a zvi tsumbisako zva maheka. Jehovha i tsumbisile Abrahama lezvaku i ta neha makatekwa yo tsakisa nguvhu laha misaveni. A Mufumo wakwe wu ta tisa makatekwa yalawo futsi.

Na ku nga hi kale, Sathani ni madhimoni yakwe ni vanhu vontlhe va kubiha va nga tava kona. Vontlhe va to ngha va hanya cikhatini leco va ta khozela Jehovha. Hi nga ta babya ne hi nga tafa. Siku ni siku hi ta  vhuka na hi tiyile na hi tsakela ku hanya kambe. A misava yi tava paradhise. Vontlhe va tava ni zvakuga zva zvi nene ni tiyindlu ta ti nene. A vanhu va tava va va nene, va nga tava ni xapi ne va nga ta xanisa van’wani. A zvihari zva khwati zvi nga ta hi chava, hinawu hi nga ta zvi chava.

A cikhati leci Jehovha a to sangula ku vhuxa lava va fileko, zvi ta tsakisa nguvhu. Hi ta hoyozela vanhu va hanyileko kale, vo kota Abheli, Nowa, Abrahama, Sara, Mosi, Rute, Estere na Dhavhidha. Va ta hi vhuna ku hundzulusa Misava yiva paradhise. Contlhe cikhati hi tava ni ntiro wo tsakisa.

Jehovha i lava lezvaku wena uva seyo. U ta mu tiva hi ndlela ya ku cima u wa nga se yi alakanyela. A hi simami ku tiyisa wunghana ga hina na Jehovha, ava yena munghana wa hina wa hombe nguvhu siku ni siku, kala kupindzuka!