Timote i wa hi jaha ga muKristu bandleni ga le Listra. A papayi wakwe i wa hi muGreki, a mamani wakwe i wa hi muJudha. A mamani wakwe Eunike ni kokwani wakwe Loisi, va sangulile ku mu gondzisa xungetano hi Jehovha na a ha hi n’wanana.

A cikhati leci Pawule a nga endzela Listra ka lipfhumba lakwe la wumbiri la ku famba a chumayela, i no ya wona lezvaku Timote i wa va randza nguvhu a vamakabye niku i wa zvi randza nguvhu ku va vhuna. Pawule i no ramba Timote lezvaku a famba naye ka tipfhumba takwe. Hi kufamba ka cikhati, Pawule i no gondzisa Timote a ntiro wa kuchumayela ni ku gondzisa mahungu yo saseka.

Kontlhe lomu Pawule na Timote va nga kari vaya kona, va wa rangelwa hi moya wa ku basa. Ka wusiku go kari, Pawule i nova ni muwoniso. Ka muwoniso lowo, i no wona wanuna wo kari na a mu vitana lezvaku aya Makedhoniya kasi a ya va vhuna. Pawule, Timote, Silasi na Luka va noya Makedhoniya va ya chumayela ni ku yimisa mabandla.

Le Tesalonika, gi nga hi dhoropa go kari ga Makedhoniya, a vanhu vo tala — vavanuna ni vavasati — va no maha maKristu. Kanilezvi, a vaJudha vo kari va no lusa nguvhu hi lezvi Pawule ni vanghana vakwe va nga maha. Va no vitana vanhu vo tala va ta khoma vamakabye lavo va famba navo ka tihosi ta dhoropa, va yaku: ‘A vavanuna lava valala va mufumo wa Roma’. Pawule na Timote va wa hi kusuhani ni ku dawa. Hikwalaho, va no tsutsuma va ya Bhereya ni wusiku.

A vanhu va le Bhereya va wa zvi lava nguvhu a kuzwa mahungu yo saseka. A vaGreki ni vaJudha vo kari va le Bhereya va no kholwa. Kanilezvi, loku ku tile vaJudha vo kari hi le Tesalonika va ta vhuxa gujeguje, Pawule i noya Atensi. Timote na Silasi va no sala le Bhereya va tiyisa vamakabye. Hi kufamba ka cikhati, Pawule i no ruma Timote a tlhela Tesalonika a ya vhuna vamakabye lezvaku va tiva ku lwisana  ni tixanisa leti va nga kumana nato. Loku ku hundzile cikhati co kari, Pawule i no ruma Timote lezvaku a ya vhuxela mabandla man’wani ni ku tiyisa vamakabye.

Pawule i no byela Timote aku: ‘Lava va lavako ku tirela Jehovha va ta xanisiwa’. Timote i xanisilwe a tlhela a vhalelwa mapaxweni hi kota ya kukholwa kakwe. I wa tsaka hi lungelo gakwe ga ku kombisa lezvaku i tsumbekile ka Jehovha.

Pawule i byelile maKristu ya le Filipi aku: ‘Ndza mu rumelela Timote. I ta mu gondzisa ku hanya kota malandza ya Jehovha a tlhela a mu gondzisa ku chumayela’. Pawule i wa mu tsumba Timote. Va wa hi vanghana niku va tirile zvin’we hi malembe yo tala.