Ka siku go kari Evha na a hi yece, ku nota nyoka yi ta wulawula naye. Yi te: ‘Lisine ku Nungungulu i te mu ngagi mihandzu ya tisinya tontlhe ke’? Evha aku: ‘Hi ngaga mihandzu ya tisinya tontlhe. Kanilezvi, yin’we basi hi nga faneliko kuga. Loku higa mihandzu ya sinya leyo, hi tafa’. A nyoka yiku: ‘Mu nga tafa. Hi lisine, loku muga mu ta fana na Nungungulu’. Lezvo zvi wa hi lisine? Ahihi, ma wa hi mawunwa. Kanilezvi Evha i kholwile. Laha Evha a ngaya a wu cuwuka nguvhu handzu lowo, i noya a wu navela nguvhu. I noga handzu lowo a tlhela a nyika na Adhamu. Adhamu i wa zvi tiva ku loku va nga ingisi Jehovha va tafa. Hambu lezvi a nga zvi tiva i noga handzu lowo.

Ni gambo ga kona, Jehovha i no wulawula na Adhamu na Evha. I no va wutisa a ku hikuyini va nga tsika ku mu ingisa. Evha i no lumbeta nyoka; Adhamu a lumbeta Evha. Kota lezvi Adhamu na Evha va nga tsika ku ingisa Jehovha, i no va hlongola lomu sin’wini. I no veka tingilozi ni cipadha ca ndzilo laha ndleleni ya kuya lomu sin’wini kasi va nga ha tshuki va nghena.

Jehovha i no tlhela a wula lezvaku loyi a nga kalavela Evha yenawu i wa ta tsayisiwa. Kanilezvi leci hakunene ci nga wulawula na Evha, ku wa nga hi nyoka. Jehovha a nga mahangi tinyoka kasi ti wulawula. I ngilozi yo biha yi nga maha lezvaku a nyoka yi wulawula. Yi mahile lezvo kasi ku kalavela Evha. A ngilozi leyo yi vitaniwa ku hi Sathani. Cikhatini ci tako, Jehovha i ta lovisa Sathani kasi a nga ha kuceteli vanhu kambe lezvaku va maha zvo biha.