Loku Adhamu na Evha va humile lomu sin’wini ga Edheni, va noya pswala vana vo tala. A matewula yabye, Kana, i no maha murimi. Loyi wa wumbiri, ku nga Abheli, i no maha murisi.

Ka siku go kari, Kana na Abheli va no maha miphahlo ka Jehovha. Wa zvi tiva ku cini a muphahlo? Munyikelo wu mahelwako Nungungulu. Jehovha i no tsaka hi muphahlo wa Abheli, kanilezvi lowu wa Kana a nga wu tsakelangi. Lezvo zvi no mu zangarisa nguvhu Kana. Jehovha i no mu byela lezvaku a ti wonela hakuva a zanga yakwe yi wa ta mu kuca ku maha zvilo zva ku biha. Kanilezvi Kana a nga ingisangi.

 Kana i no byela Abheli aku: ‘A hi fambi masin’wini’. Laha va nga hi voce kwale masin’wini, Kana i no jikela makabye wakwe a mu daya. Zvini lezvi Jehovha a nga maha? Jehovha i no tsayisa Kana hi ku mu hlongola a ya tshama kule ni maxaka yakwe, niku i wa nga ha faneli ku tshuka a tlhela kaya.

A mhaka leyi yi hi gondzisa yini? Yi hi gondzisa lezvaku loku a zvilo zvi nga fambi hi ndlela leyi hi nga alakanya ku zvi ta famba hi yona, hi nga tshuka hi sangula ku zangara. Loku hizwa ku a zanga ya hina ya kula — kutani loku a van’wani va zvi wona va gumesa va hi byela ku hi ti wonela — hi fanele ku tekela ku zama ku ti khoma kasi a zanga yi nga hi hluli.

Kota lezvi Abheli a nga randza Jehovha a tlhela a maha zva zvi nene, Jehovha a nga ta mu rivala. Jehovha i ta vhuxa Abheli a cikhati leci a to cica misava yi maha paradhise.