Nowa, ni ngango wakwe zvin’we ni zvihari va no nghena lomu tarwini. Jehovha i no vhala livati zvonake a vhula yi sangula kuna. Yi nona nguvhu laha ka kuza a taru gi sangula ku deluka. Hi magumo, a misava yontlhe yi no tala hi mati, kufa vanhu vontlhe va mahanyela yo biha va nga hi lahandle ka taru. Kanilezvi, Nowa ni ngango wakwe a va fangi lomu ndzeni ka taru va nga hi kona. Hikwalaho, va tsakile nguvhu hi lezvi va nga ingisa Jehovha.

A vhula yi no mbheta 40 wa masiku na yina wusiku ni mumu; yi guma yica. A mati ma no sangula kupswha hi kutsongwani-kutsongwani. Hi ku gumesa a taru gi no ya nyima le hehla ka zvitsunga. Kota lezvi ku nga ha hi ni mati yo tala laha misaveni yontlhe, Nowa ni ngango wakwe va no tshama lomu tarwini.

Hi kutsongwani-kutsongwani, a misava yi no woma. Nowa ni ngango wakwe va tshamile lembe ni ku hundza lomu tarwini. Jehovha i no gumesa a va byela lezvaku va huma. A cikhati va nga huma, va ti zwile na va hi misaveni yiswa. Va wa mu bonga nguvhu Jehovha hi lezvi a nga va ponisa, va gumesa va zvi kombisa hi ku mu mahela muphahlo.

Jehovha i tsakile hi muphahlo wabye. I tlhelile a va tsumbisa lezvaku a nga ta ha lovisa kambe misava hi ndambi. Kota cikombiso ca citsumbiso cakwe, i humesile a wura go sangula ga nyazimu le tilweni. Wa tshuka u gi wona a wura ga nyazimu?

Jehovha i no tlhela a byela Nowa ni ngango wakwe lezvaku va pswala vana va tata misava.