Hi kufamba ka cikhati, a misava yi no tala hi vanhu. A ku tala kabye va wa hi ni mahanyela yo biha. Ni tingilozi to kari le tilweni tonawu ti no cica tiva ni mahanyela yo biha. Ti no suka kaya ka tona le tilweni tita laha misaveni. Wa zvi tiva a ku hikuyini ti nga maha lezvo? Ti wa lava ku teka mimiri ya vavanuna kasi ti tekana ni vavasati.

A vavasati lavo ni tingilozi va no pswala vana. A vana lavo va no kula vava ni ntamu va sangula ku dzukisela vanhu. Va wa bayisela vanhu. Jehovha i wa nga ta tsika zvilo lezvo zvi simama. Hikwalaho i no zvi wona zvi hi chukwana ku lovisa vanhu lavo hi ndambi.

Kanilezvi ku wa hi ni wanuna a nga hambene ni van’wani. A wanuna loye i wa randza Jehovha. A vito gakwe ku wa hi Nowa. I wa hi ni vana vanharu va vafana. A mavito yabye ku wa hi Xemi, Hamu, na Jafete. A mun’we ni mun’wani wabye i wa hi ni sati. Jehovha i no byela Nowa lezvaku i wa fanele ku aka taru ga hombe kasi yena ni ngango wakwe va nga dawi hi ndambi. A taru i nchumu ca hombe co fana ni kaxa, co mahiwa hi mapulangu, kanilezvi na ci deluka lomu matini. Jehovha i tlhelile a byela Nowa lezvaku a nghenisela zvihari zvo tala lomu tarwini kasi zvonawu zvi nga dawi hi ndambi.

Nowa i no tekela ku sangula ku aka taru. Nowa ni ngango wakwe va mbhetile cipimo ca 50 wa malembe na va aka. Va gi akisile zvalezvi Jehovha a nga va byelile ku va gi akisa zvona. Hi cikhati caleci ca cin’we, Nowa i wa byela vanhu lezvaku va ti wonela ndambi yi nga hata. Kanilezvi ne mun’we a nga ingisangi.

Hi magumo, ku no chikela cikhati ca ku nghena lomu tarwini. A hi wone ku zvini zvi nga guma zvi humelela.