Ja ku wa hundza malembe yo tala Abrahama na Sara na va chadhile. Va wa siyile muti wabye wa wu nene le Ure va ya hanya lomu ka tenda. Kanilezvi Sara i wa nga soli hi ku i wa tsumba Jehovha.

Sara i wa mu lava nguvhu n’wana laha ka kuza a byela Abrahama aku: ‘Loku a mutiri wa mina Hagari a pswala n’wana na wena, ndzi nga mu wonisa ku khwatsi wa mina’. Hi ku famba ka cikhati, Hagari i no pswala n’wana. A vito gakwe ku wa hi Ixmayeli.

Loku ku hundzile malembe yo tala, Abrahama na a hi ni 99 wa malembe Sara na hi ni 89, va no endzelwa hi vapfhumba vanharu. Abrahama i no va ramba lezvaku va ya humula laha ndzhutini wa sinya a tlhela a va nyika zvakuga. Wa zvi tiva ku a vapfhumba lavo ku wa hi vamani? Ku wa hi tingilozi! Ti no byela Abrahama tiku: ‘A lembe gi tako hi cikhati caleci, wena ni sati wa wena mu tava ni n’wana’. Sara i wa kari a ingisela na a hi lomu tendeni. Hikwalaho, i no hleka hi le mbilwini a gumesa a pimisa lezvi: ‘Hakunene ndzi ngava ni n’wana lezvi makunu ndzi kumbileko’?

Ka lembe gi nga landzela, Sara i no pswala n’wana wa mufana, kota lezvi a ngilozi ya Jehovha yi nga va tsumbisile. Abrahama i no mu chula vito aku hi Isaka, lezvi zvi wulako ku “Mahleko”.

 Laha Isaka a nga hi ni cipimo ca 5 wa malembe, Sara i wonile lezvaku Ixmayeli wa tolovela ku hleka Isaka. Sara i wa lava ku vhikela n’wana wakwe. Hikwalaho, i noya ka Abrahama a ya mu kombela ku a hlongola Hagari na Ixmayeli. Kusanguleni, Abrahama i wa nga zvi lavi ku va hlongola. Kanilezvi Jehovha yenawu i wa lava ku vhikela Isaka. Hikwalaho, i no byela Abrahama aku: ‘Maha lezvi Sara a ku byelako. Ndzi ta mu hlayisa Ixmayeli. Kanilezvi, ndzi ta tirisa Isaka kasi ku tatisa zvitsumbiso zva mina’.