Jehovha i tsumbisile Jakobe ku i wa ta mu vhikela a ku fana ni lezvi a nga vhikela Abrahama na Isaka. Jakobe i no ya tshama Harani; a teka sati kwaseyo, a pswala vana vo tala a tlhela a ganya nguvhu.

Jehovha i no gumesa a byela Jakobe aku: ‘Tlhela tikweni legi u nga pswaliwa ka gona’. Jakobe ni ngango wakwe va no sangula lipfhumba la hombe la ku tlhela kaya. Na va ha famba, Jakobe i no khingiwa hi vanhu vo kari va ta mu byela lezvi: ‘A makabye wa wena Esawu wata, i na ni 400 wa vavanuna’! Jakobe i no alakanya lezvaku Esawu i wa hi lomu ka ku hlota yena ni ngango wakwe. Hikwalaho, i no chava nguvhu zvonake a maha mukombelo ka Jehovha aku: ‘Jehovha, ndzi kombela ku a makabye wa mina a nga ndzi dayi’. Ka siku gi nga landzela, Jakobe i no rumela zvifuyo zvo kari ka Esawu — tiyivhu, timbuti, tihomu, makameli, ni timbongola.

Ni wusiku ga kona, Jakobe i no wona ngilozi na a hi yece! A ngilozi yi no sangula kulwa naye. Va nolwa kala gica. Hambu lezvi Jakobe a nga bayisiwa, a nga yi tsikangi. A ngilozi yi te: ‘Ndzi tsike ndzi famba.’ Kanilezvi Jakobe i no hlamula aku: ‘A ndzi zvi lavi! Ndzi nga ta ku tsika, kala u ndzi katekisa’.

A ngilozi yi no gumesa yi mu katekisa. Jakobe i no tekela ku zvi wona lezvaku Jehovha i wa nga ta tsika Esawu a mu mahela kubiha.

 Ni mixo ya kona, Jakobe i no cuwuka le kulanyana zvonake a wona Esawu na a hi ni 400 wa vavanuna. Jakobe i no ranga a siya ngango wakwe a ya khizamela makabye wakwe 7 wa makhati. Esawu i no tsutsumela Jakobe a ya mu angarela. Hi wumbiri gabye va no rila va gumesa va tsetselelana. U alakanya ku Jehovha i ti zwisile kuyini loku a wonile lezvi Jakobe a nga yi lulamisisa zvona a mhaka leyi?

Va no guma va hambana. Esawu a tlhela kaya kakwe, Jakobe a simama ni pfhumba gakwe. Jakobe i wa hi ni 12 wa vana. A mavito yabye ku wa hi Rubheni, Simeyoni, Levhi, Judha, Naftali, Dhani, Gadhi, Axeri, Isakari, Zebhuloni, Josefa na Bhenjamini. A mun’we wa vana lavo — ku nga Josefa — i tirisilwe hi Jehovha kasi ku ponisa vanhu vakwe. Wa zvi tiva ku hi ndlela muni? Hi ta zvi wona.