A cikhati leci Isaka a nga hi ni cipimo ca 40 wa malembe i no chadha na Rebheka. Isaka i wa mu randza nguvhu Rebheka. Hi ku famba ka cikhati, va no pswala mahahla — majaha mambiri.

Loyi wa nhondzo ku wa hi Esawu, loyi wa ndzisana ku wa hi Jakobe. Esawu i wa randza ku tshama lomu khwatini a hlota. Kanilezvi, Jakobe i wa randza ku tshama laha kaya.

Cikhatini leco, a n’wana wa nhondzo hi yena a nga nyikwa petso wa hombe ni mali yo tala loku a papayi wabye afa. Lezvo zvi wa vitaniwa ku i tshomba. Laha ngangweni wa Isaka, a tshomba leyo yi wa patsa ku a munhu a patseka ka zvitsumbiso zva Jehovha ka Abrahama. Esawu i wa nga hi na mhaka ni zvitsumbiso lezvo, kanilezvi Jakobe i wa zvi nyika nguvhu lisima.

Ka siku go kari, Esawu i no wuya hi kuhloteni na azwa ndlala ya hombe. Laha a ngazwa masema ya ma nene ya zvakuga lezvi Jakobe a nga kari a bhika, ite: ‘Ndzafa hi ndlala! Ndzi phamele zvakuga lezvo ndziga’! Jakobe a mu byela lezvi: ‘Ndzi ta ku nyika. Kanilezvi ranga hi ku ndzi tsumbisa ku u ta ndzi nyika tshomba ya wena’. Esawu a mu hlamula lezvi: ‘A ndzi na mhaka ni tshomba ya mina! U ta yi kuma. Mina ndzo lava kuga basi’. Hi mawonela ya wena, Esawu i mahile ciboho ca ci nene ke? Ahihi. Esawu i nyikele nchumu wa lisima nguvhu, hi kota ya parato ya zvakuga basi.

 Laha Isaka a nga kumba makunu, ku wa hi cikhati ca ku a katekisa n’wana wakwe wa nhondzo. Kanilezvi Rebheka i no vhuna Jakobe, a n’wana wabye wa ndzisana, lezvaku a kuma makatekwa. Laha Esawu a nga zvi tiva, i no zangara nguvhu a gumesa a maha makungo ya ku daya ndzisana yakwe. Isaka na Rebheka va wa lava ku vhikela Jakobe. Hikwalaho, va no mu byela lezvi: ‘Tsutsuma u ya tshama na tiyo Labani, a makabye wa mamani, kala Esawu a bohla zanga yakwe’. Jakobe i no ingisa lezvi mamani ni papayi wakwe va nga mu byela, a tsutsuma kasi a nga dawi.