Mosi i no tsumbisa Faro lezvaku i wa nga ta ha zama ku wonana naye kambe. Kanilezvi, na a nga se suka a famba, i no byela Faro aku: ‘Cikari ka wusiku ga nyamutlha, a vafana vontlhe va matewula ya vaGibhite va tafa, kusukela ka n’wana wa wena kala ka vana va zvitiri’.

Jehovha i no byela vaIzrayeli lezvaku va bhika zvilo zvo hlawuleka vaga. I te: ‘Dayani yivhu kutani mbuti ya matsune ya lembe gin’we, mu totela nkhata wa kona lomu tinyangweni ta n’wina. Wocani nyama ya kona muga ni tipawa ti nga cheliwangiko zva ku kukumukisa hi zvona. Bohani masandaliya ya n’wina, mu tshama na mu longile kasi mu famba. Ndzi ta mu tlhatlhisa wusiku legi’. A vaIzrayeli va wa tsakile nguvhu, a hi zvona?

Laha cikari ka wusiku, a ngilozi ya Jehovha yi noya lomu tindlwini tontlhe ta le Gibhite. Ka yindlu leyi yi nga kala yi nga totelwangi nkhata laha nyangweni, yi no daya n’wana wa mufana wa matewula. Kanilezvi, ka tiyindlu leti ti nga totelwe nkhata, a ngilozi yi no hundza hi le hehla. Ka miti yontlhe ya vaGibhite, ya lava vo ganya ni ya lava va zvisiwana, ku nofa n’wana. Kanilezvi, ne n’wana mun’we wa vaIzrayeli a ngafa.

Ni n’wana wa Faro yenawu i delwe. Faro a nga ha zvi kotangi ku zvi timisela.  I no tekela ku byela Mosi na Aroni aku: ‘Sukani mu famba. Fambani mu ya khozela Nungungulu wa n’wina. Tekani zvihari zva n’wina mu famba’!

A vaIzrayeli va no huma lomu Gibhite a n’weti na wu te pa, va famba hi mingango ni tixaka tabye. Va wa hi 600 000 wa vavanuna, zvin’we ni vavasati ni vanana vo tala. Ku fambile ni vanhu van’wani vo tala va nga hiko vaIzrayeli kasi vonawu va ya khozela Jehovha. Makunu va wa tlhatlhisilwe!

Lembe ni lembe, a vaIzrayeli va wa fanele kuga nchumu wo hlawuleka wo fana ni lowu va ngaga siku lego, kasi va alakanya lezvi Jehovha a nga va tlhatlhisisa zvona. A cimaho leco, ci vitaniwa ku i Pasika — zvi wulako ku ku hundza hi le hehla.