Mosi na Aroni va no ya byela Faro lezvi Nungungulu a nga wula. Vaku Nungungulu i te: ‘Loku u nga tsiki vanhu va mina va famba, ndzi ta rumela mabhowani lomu tikweni ga wena’. A mabhowani ma no pomela tiyindlu tontlhe ta vaGibhite — ta lava vo ganya ni ta zvisiwana. A tiko gontlhe gi wa tele hi mabhowani. Kanilezvi le tikweni ga Goxeni, lomu a vaIzrayeli va nga tshama kona, ku wa nga hi na mabhowani. Kusukela ka khombo ga wu 4, wontlhe lawa ma nga landzela ma no xanisa vaGibhite basi. Faro i no kombela aku: ‘Khongotelani Jehovha a susa mabhowani lawa. A vanhu va n’wina va ta gumesa va famba’. Kanilezvi, a cikhati leci Jehovha a nga susa mabhowani, Faro i no cica, a nga ha vhumelangi ku va tsika va famba. Xana Faro i wa ta tshuka a gondza cokari?

Jehovha i no wula lezvi: ‘Loku Faro a nga tsiki vanhu va mina va famba, a zvihari zva vaGibhite zvi ta babya zvi tlhela zvifa’. Hi mandziko wa kona, a zvihari zva vaGibhite zvi no sangula kufa. Kanilezvi, a zvihari zva vaIzrayeli a zvi fangi. Faro i no simama a sihalala, niku a nga va tsikangi va famba.

Hi ku landzela, Jehovha i no byela Mosi lezvaku aya ka Faro a ya xwanya khuma le hehla. A khuma gi no maha lithuri kutani pukutsa, zvonake yi tata kontlhe yi tlhela yi namarela vaGibhite vontlhe. A lithuri, yi no vanga zvidlayi lomu mimirini ya vaGibhite vontlhe ni ka zvihari zvabye. Ni ka zvontlhe lezvo, Faro a nga vhumelangi ku tsika vaIzrayeli va famba.

Jehovha i no ruma Mosi lezvaku a tlhela ka Faro a ya mu wutisa lezvi: ‘Wa ha ala ku tsika vanhu va mina va famba ke? A mandziko ndzi ta nisa vhula ya  maralala tikweni ga wena’. Hi mandziko wa kona, Jehovha i no rumela maralala, kudzindza, ni kuhatima. Ku wa hi ni moya wa hombe nguvhu wa ku cima wu wa nga se woniwa le Gibhite. A timbewu ni tisinya tontlhe zvi no hahlulwa. Kanilezvi, le tikweni ga Goxeni a ku hahluliwangi nchumu. Faro aku: ‘Khongotelani Jehovha a nyimisa moya lowu, mu ta gumesa mu famba’. Kanilezvi, zvalezvi a maralala ni vhula zvi nga nyima, Faro i no cica kambe, a ala ku va tsika va famba.

Mosi a gumesa aku: ‘Tontlhe a tisinya ti nga siyiwa hi vhula ya maralala, ti ta giwa hi mabhandzala’. Ku nota mabhandzala ya talela ga cima ma taga zvontlhe zvi nga sele lomu masin’wini ni lomu tisinyeni. Faro a kombela aku: ‘Khongotelani Jehovha lezvaku a susa a mabhandzala lawa’. Kanilezvi, hambu cikhati leci Jehovha a nga nyimisa mabhandzala, Faro i no simama a sihalala.

Jehovha i no byela Mosi aku: ‘Tlakusa canja ga wena le tilweni’. Zvalezvi a nga tlakusa, ku no tekela ku phuma ku ku dema. A vaGibhite va no tshama lomu munyameni hi masiku manharu, va nga woni nchumu ne va nga wonani. A vaIzrayeli hi vona voce va nga hi kuwonekeleni lomu mitini yabye.

Faro a byela Mosi aku: ‘Wena ni vanhu va n’wina mu nga famba. Kanilezvi a zvihari zva n’wina zvi siyeni’. Mosi aku: ‘Hi fanele ku famba ni zvihari zva hina kasi hi ya maha hi zvona munyikelo ka Nungungulu wa hina’. Faro i no zangara nguvhu. A bhonga aku: ‘Suka laha ka mina! Loku wo tsangila laha ka mina, ndzi ta ku daya’.