Le tikweni ga Uzi, ku wa hi ni wanuna a nga khozela Jehovha. A vito gakwe ku wa hi Joba. I wa hi wanuna wo ganya nguvhu a nga hi ni ngango wa hombe. I wa hi mu nene niku i wa vhuna zvisiwana, vavasati va felweko hi vanuna, ni vana vo kala va nga hi na vapswali. Kanilezvi, xana lezvi a nga kari a maha zva zvi nene, zvi wula lezvaku Joba i wa nga ta tshuka a kumana ni zvikarato?

Sathani i wa tshama hi ku mu cuwukisela. Kanilezvi, Joba i wa nga zvi tivi. Jehovha i no byela Sathani aku: ‘U gi wonile nandza ga mina Joba? A ku na mun’wani wo fana naye laha misaveni. Wa ndzi ingisa a tlhela a maha zva zvi nene’. Sathani i no hlamula Jehovha aku: ‘Lisine, wa ku ingisa. Wenawu wa mu vhikela u tlhela u mu katekisa. U mu nyikile tshomba lomu tikweni ni zvihari. Mu tekele zvontlhe a nga nazvo. U ta zvi wona, i ta tsika ku ku khozela’. Jehovha aku: ‘Mu ringe. Kanilezvi, u nga mu dayi’. Hikuyini Jehovha a nga tsika Sathani a ringa Joba? I wa zvi tiva khwatsi ku Joba i wa nga ta tsika ku mu ingisa.

Sathani i no sangula ku ringa Joba hi zvikarato zvo tala. A ku sangula, i no rumela vanhu va vitaniwako ku vaSabheya va ya yiva tihomu ni timbongola takwe. A tiyivhu takwe ti no guma ti hisiwa hi ndzilo, kuta vanhu van’wani va maKaldheya va ta yiva makameli yakwe. A zvitiri zvakwe lezvi zvi nga kari zvi hlayisa zvihari lezvo, zvonawu zvi no dawa. Ku no gumesa ku landzela khombo ga hombe nguvhu. Vontlhe vana va Joba va no welwa hi yindlu vafa a cikhati leci va nga kari va maha festa. Joba i no bayiseka nguvhu. Kanilezvi, a nga tsikangi ku khozela Jehovha.

Sathani i wa ha lava ku Joba a xaniseka nguvhu. Hikwalaho, i no maha lezvaku a miri wa Joba wontlhe wu tala hi zvilondza.  Joba i wazwa kubayisa ka hombe nguvhu. I wa nga zvi tivi a ku hikuyini zvontlhe lezvo zvi nga mu humelela. Hambulezvo, Joba i simamile a khozela Jehovha, niku Jehovha i zvi wonile zvontlhe lezvo, a tlhela a tsaka nguvhu hi Joba.

Hi ku landzela, Sathani i no rumela vavanuna vanharu kasi va ya ringa Joba. Va no mu byela lezvi: ‘Ku na ni ciwonho u nga maha u zamako ku ci fihla. Nungungulu o ku tsayisa’. Joba a hlamula aku: ‘A ndzi wonhangi nchumu’. Kanilezvi, i no gumesa a sangula ku alakanya lezvaku Jehovha hi yena a nga kari a mu vangela zvikarato lezvo, a tlhela a mu sola aku lezvi a nga kari a mu mahela zvi wa nga hi zvi nene.

Ku wa hi ni mufana wo kari wa ku hi Elihu, loyi a nga kari a ingisela khwatsi a bhulo lego. I no gumesa a sangula ku wulawula aku: ‘Zvontlhe lezvi mu nga zvi wula a hi lisine. Jehovha wa hombe a ku hundza lezvi hi nga zvi zwisisako. I wa nga ta tshuka a maha zva ku biha. Wa zvi wona zvontlhe zvi mahekako niku wa vhuna vanhu ka zvikarato zvabye’.

Jehovha i no gumesa a wulawula na Joba, aku: ‘U wa hi kwihi a cikhati leci ndzi nga maha tilo ni misava? Hikuyini u nge lezvi ndzi mahako a hi zvi nene? Wo wulawula basi, kanilezvi a wu zvi tivi ku hikuyini a zvilo lezvi zvi humelelako’. Joba i no gumesa a vhumela ku i phazamile, zvonake aku: ‘Ndzi phazamile. Ndzi wozwa ku u kona, kanilezvi zvezvi ndza ku tiva khwatsi. A ku na nchumu u ci tsandzekako. Ndzi tsetselele lezvi ndzi nga wula’.

A cikhati leci a zviringo zvi nga mbhela, Jehovha i no hanyisa Joba a tlhela a mu nyika zvilo zvo tala ku hundza lezvi a nga hi nazvo kusanguleni. Joba i no gumesa a hanya hi cikhati co leha na a tsakile. Jehovha i katekisile Joba hi lezvi a nga mu ingisa hambu ka cikhati leci zvi nga karata. Wena ke, u ta fana na Joba u simama ku khozela Jehovha, hambu loku zvi karata?