A cikhati leci Josefa a nga hi lomu paxweni, Faro a hosi ya Gibhite, i nova ni miloro ya ku i hava a nga zvi kota ku mu tlhamusela. A citiri co kari ca Faro ci no mu byela lezvaku Josefa a nga zvi kota ku mu tlhamusela miloro yakwe. Faro i no tekela ku vitanisa Josefa.

Loku a chikele, i no byela Josefa aku: ‘Hi nga ndzi tlhamusela miloro ya mina’. Josefa a tlhamusela Faro aku: ‘Ka 7 wa malembe lawa ma tako, a zvakuga zvi ta pfuna nguvhu lomu Gibhite, ku guma ku landzela 7 wa malembe ya ndlala. Hlawula munhu wa ku tlhariha lezvaku a hlengeletela zvakuga kasi a vanhu va wena va ngafi hi ndlala’. Faro aku: ‘Ndzi hlawula wena! U tava wa wumbiri hi wuhosi lomu Gibhite’! Makunu Josefa i wu tivisile kuyini a tlhamuselo wa miloro ya Faro? Hi Jehovha a nga mu vhuna.

Ndzeni ka 7 wa malembe lawa ma nga landzela, Josefa i no hlengeletela zvakuga. Loku ma hundzile, ku no sangula ndlala lomu tikweni gontlhe, kota lezvi Josefa a nga wulile. Ku no sangula kuta vanhu hi ka matshamu wontlhe va ta xava zvakuga ka Josefa. A papayi wakwe Jakobe, i nozwa lezvaku le Gibhite ku wa hi ni zvakuga. Hikwalaho, cikari ka vana vakwe, i no ruma a 10 wa vona lezvaku va ya xava zvakuga.

A vana va Jakobe va noya ka Josefa. Zvalezvi a nga va wona, i no tekela ku va tiva. Kanilezvi, vona a va mu tivangi. Va no mu khizamela; ku se maheka zvalezvi a nga lorile na a ha hi n’wanana. Josefa i wa lava ku tiva ku a vamakabye vakwe va wa ha bihile ke. Hikwalaho, i no va byela lezvi: ‘N’wina mu zvipiyawu. Mu lava ku tiva ku gi tshamisile kuyini a tiko ga hina’. Vona va no hlamula vaku: ‘Ahihi! Hita hi le Khanani. Hi pswalilwe na hi hi 12 wa vamakabye. A mun’we wa kona i file; loyi wa ndzisana i sele na papayi’. Josefa aku: ‘Fambani mu ya teka ndzisana ya n’wina muta nayo, hi  kona ndzi to kholwa’. Hikwalaho, va no tlhela kaya ka papayi wabye.

A cikhati leci va nga mbheta zvakuga, Jakobe i no ruma vana vakwe lezvaku va tlhela le Gibhite. Ka khati legi, va no teka Bhenjamini a ndzisana yabye, va famba naye. Kasi ku ringa vamakabye vakwe, Josefa i no peta kopo yakwe ya silivha lomu ka sakwa ya Bhenjamini yi nga hi ni zvakuga, a gumesa a va lumbeta ku va no yiva. A cikhati leci a zvitiri zva Josefa zvi nga kuma kopo lomu sakweni ya Bhenjamini, a vamakabye va kona va no karateka. Va no khongotela Josefa lezvaku a tsayisa vona, a tsika Bhenjamini.

Josefa i no tekela ku zvi pola lezvaku a vamakabye vakwe va wa cicile. A nga ha zvi kotangi ku ti khoma. I no rila; a gumesa aku: ‘Hi mina Josefa, a makabye wa n’wina. Wa ha hanya papayi wa mina’? A vamakabye vakwe va no hlamala nguvhu. I no va byela lezvi: ‘Mu nga tizwi nandzu hi kota ya lezvi mu nga ndzi maha. Hi Nungungulu a nga ndzi rumela seno kasi ku ta ponisa wutomi ga n’wina. Ndzi kombela a ku mu hatlisa mu ya teka papayi mu wuya naye’.

Va no tlhela kaya va ya byela papayi wabye a mahungu lawo yo saseka va tlhela va mu teka va famba naye le Gibhite. Ka cikhati leco, Josefa ni papayi wakwe va no tlhela va tlhangana kambe, andzhako ka malembe yo tala.