Le Gibhite, a vana va Jakobe va wa vitaniwa ku vaIzrayeli. Andzhako ka ku Jakobe na Josefa va file, ku no sangula ku fuma hosi yin’wani le Gibhite. Faro loye i wa chava lezvaku a vaIzrayeli va wa ta tala vava ni ntamu a ku hundza vaGibhite. Hikwalaho, i no xanisa vaIzrayeli; a va kurumeta kuba mabloko a tlhela a va tirisa nguvhu lomu masin’wini. Kanilezvi, laha a vaGibhite va ngaya va va tirisa nguvhu, a vaIzrayeli va wo simama ku tala. Kota lezvi Faro zvi nga kala zvi nga mu tsakisi, i no laya lezvaku zvontlhe a zvivanana zva vafana zva vaIzrayeli zvi dawa na zva ha hi ku pswaliwa. A vaIzrayeli va no chava nguvhu.

A wasati wo kari wa muIzrayeli wa ku hi Jokebhedhe i no pswala cifanyana co saseka nguvhu. Kasi ku ci vhikela, i no ci chela lomu ka ndzhava a gumesa a ya wu fihla lomu ka byanyi le Congweni wa Nilo. Miriyamu a makabye wa cifanyana leci, i no tshama kusuhani ni ndzhava lowo kasi a wona lezvi zvi nga wa ta humelela.

A cikhati leci a nhanyana wa Faro a ngata ku ta hlamba lomu congweni, i no wona ndzhava.  Lomu ka ndzhava lowo, i no kuma cin’wanana na ci rila, a ci zwela wusiwana. Miriyamu a mu wutisa aku: ‘Ndzi ya ku vitanela wasati kasi a ta ku an’wisela cin’wanana leci ke’? A cikhati leci a nhanyana wa Faro a ngaku ina, Miriyamu i no ya vitana Jokebhedhe, a mamani wa cifanyana leco. A nhanyana wa Faro i no ta byela wasati loye aku: ‘Teka n’wanana loyi, u ya ndzi an’wisela, ndzi ta ku hakhela’.

A cikhati leci a n’wanana a nga kula, Jokebhedhe i no mu heleketa ka nhanyana wa Faro. A nhanyana wa Faro, i no mu chula ku hi Mosi a tlhela a mu hlayisisa ku khwatsi i n’wana wakwe. Mosi i no wundliswa ku khwatsi i n’wana wa hosi niku i wa kuma zvontlhe a nga zvi lava. Kanilezvi Mosi a nga tshukangi a rivala Jehovha. I wa zvi tiva khwatsi ku muIzrayeli — i wa nga hi muGibhite — a tlhela a hlawula ku tirela Jehovha.

A cikhati leci a nga hi ni 40 wa malembe, i no zvi wona zvi hi chukwana ku vhuna vaIzrayeli-kulobye. Laha a nga wona muGibhite wo kari na aba muIzrayeli, Mosi i noba a muGibhite loye laha ka kuza afa. A gumesa a tumbeta cirumbi ca kona lomu ka civhunyi. A cikhati leci Faro a nga zvi tiva, i no zama ku daya Mosi. Kanilezvi Mosi i no tsutsuma a ya tikweni ga Midhiyani. Jehovha i no mu hlayisa ni kwaseyo a ngaya kona.