Mosi i tshamile 40 wa malembe le Midhiyani. I no teka sati a tlhela a pswala vana. Ka siku go kari na a gisa tiyivhu takwe kusuhani ni Citsunga ca Sinayi, i no wona nchumu wo hlamalisa. I no wona sinya na wu vhura ndzilo, kanilezvi wu wa ngaswi! A cikhati leci Mosi a nga tshinela kusuhani kasi ku tiva ku hikuyini, i nozwa gezu hi lomu ka sinya lowo giku: ‘Mosi! U nga tshineli laha. Tlhatlha masandaliya ya wena, hakuva laha u nga nyima kona wutshamu go basa’. Ku wa hi Jehovha a nga wulawula hi ku tirisa ngilozi.

Mosi i no chava zvonake a ti fenengeta nghohe. A gezu giku: ‘Ndzi wona kuxaniseka ka vaIzrayeli. Ndzi ta va tlhatlhisa ka vaGibhite, ndzi va yisa ka tiko ga gi nene. Hi wena u to rangela vanhu va mina lezvaku va huma le Gibhite’. Kuzvilava lezvo zvi mu hlamalisile Mosi, a hi zvona?

Mosi i no wutisa aku: ‘Loku va ndzi wutisa ku himani a nga ku ruma, ndzi va hlamula yini’? Nungungulu i no hlamula aku: ‘Va byele lezvaku Jehovha, a Nungungulu wa Abrahama, Nungungulu wa Isaka ni Nungungulu wa Jakobe hi yena a nga ndzi ruma’. Zvonake Mosi aku: ‘Ahati loku a vanhu va nga ndzi ingisi ke’? Jehovha i no tiyisekisa Mosi lezvaku i wa ta mu vhuna. I no mu byela lezvaku a hoxa nhonga yakwe lahasi. Loku a yi hoxile, a nhonga yi no maha nyoka! A cikhati leci Mosi a nga khoma nyoka hi suluthu, yi no cica yi maha nhonga kambe. Jehovha aku: ‘Loku u maha cihlamaliso leci mahlweni kabye, va ta kholwa lezvaku hi mina ndzi nga ku ruma’.

Mosi aku: ‘A ndzi zvi koti ku wulawula khwatsi.’ Jehovha a mu tsumbisa lezvi: ‘Ndzi ta ku byela lezvi u to wula, niku u ta famba ni makabye wa wena Aroni kasi a ku vhuna’. A cikhati leci Mosi a nga tiva lezvaku i wa hi na Jehovha, i no teka sati wakwe ni vana vakwe va tlhela Gibhite.