Zvalezvi Faro a ngazwa lezvaku a vaIzrayeli va humile lomu Gibhite, a nga tsakangi hi lezvi a nga va tsika va famba. I no laya masochwa yakwe aku: ‘Longiselani tikareta ta mina tontlhe hi va landza! Hi wa nga faneli ku va tsika va famba’. Faro ni vanhu vakwe va no sangula ku landza vaIzrayeli.

Jehovha i wa rangela vanhu vakwe; ni mumu i wa tirisa refu, ni wusiku i wa tirisa a langavi ga hombe nguvhu ga ndzilo. I no va kongomisa le Bimbini go Pswhuka zvonake a va byela lezvaku va humula kwalaho.

A vaIzrayeli va no wona Faro ni masochwa yakwe na va va landza. Va wa hi laha cikari. Se phambeni ku wa hi ni bimbi, lendzhako ku wa hi ni masochwa ya vaGibhite. Va no rilela Mosi, vaku: ‘Wa zvi wona ku hi lava ku dawa! Hikuyini u nga hi humesa le Gibhite’? Kanilezvi Mosi aku: ‘Mu nga chavi. N’wina nyimani muku tse, mu wona lezvi Jehovha a to hi ponisisa zvona’. Lezvo zvi komba ku Mosi i wa tsumba Jehovha hi mbilu yontlhe, a hi zvona?

Jehovha i no byela vaIzrayeli lezvaku va ti longisela kasi va suka. Ni wusiku, Jehovha i no jikisa refu giya laha cikari ka vaGibhite ni vaIzrayeli. Seno ka vaGibhite, ku wa hi munyama. Kanilezvi, seno ka vaIzrayeli ku wa wonekela.

Jehovha i no byela Mosi lezvaku a nawuluta canja gakwe hehla ka bimbi. Jehovha i no gumesa a maha lezvaku kuba moya wa hombe wusiku gontlhe.  A mati ya bimbi ma no avanyeka, ku sala ndlela laha cikari. A vaIzrayeli lavo vo tala nguvhu va no famba ka misava yo woma, a mati na ma mahile zvitsunga lomu matlhelweni, kala kuza va tsemakanya.

A masochwa ya Faro ma no landza hi lendzhako, wonawu ma famba hi lomu ko woma. Jehovha i no guma a vanga vhilinganya ndzeni ka masochwa. A marodha ya tikareta tabye ma no sangula ku suketela. A masochwa ma keta maku: ‘A hi humeni! Jehovha wa va lwela’.

Jehovha i no byela Mosi aku: ‘Nawuluta canja ga wena hehla ka bimbi’. I no nawuluta, a masochwa ya vaGibhite ma tekela ku mbombomela. Faro ni vanhu vakwe vontlhe va nofa. Ne mun’we a nga pona.

Ka tlhelo le gin’wani ga bimbi, a vanhu vo tala nguvhu va no sangula ku dhumisa Nungungulu hi ku yimbelela lisimu vaku: ‘A hi mu yimbeleleni lisimu Jehovha hakuva i tlakukile nguvhu; i hoxile haxi ni mukhileli wa gona lomu bimbini’. A cikhati leci va nga kari va yimbelela, a vavasati va wo kina ni kuba zvingomana. Vontlhe va wa tsakile nguvhu hi lezvi va tlhatlhisilweko.