A vaIzrayeli va no suka Citsungeni ca Sinayi va famba hi lomu ciwuleni ca Parani kala va ya chikela ka wutshamu gi vitaniwako ku Kadhexe. Loku va hi seyo, Jehovha i no byela Mosi aku: ‘Hlawula 12 wa vavanuna, mun’we ka lixaka lin’we ni lin’wani, u va ruma va ya hlola tiko ga Khanani, legi ndzi to nyika vaIzrayeli’. Mosi i no hlawula 12 wa vavanuna a gumesa a va byela lezvi: ‘Fambani Khanani, mu ya wona lezvaku a tiko legi ga pfuna zvakuga ke. Tlhelani mu wona ku a vanhu va kona va na ni ntamu kutani ahihi niku va hanya lomu matendeni kutani lomu ka madhoropa ke’. A zvipiyawu lezvo, a ku patsa na Joxuwa na Kalebhi, va noya Khanani.

Andzhako ka 40 wa masiku, a zvipiyawu lezvo zvi no tlhela ni makuwu, mapomegranadha ni mauvha. Zvi ya wula lezvi: ‘I tiko ga gi nene. Kanilezvi, a vanhu va kona va na ni ntamu niku a madhoropa ya kona ma na ni makhurisi yo leha’. Kalebhi aku: ‘Hi ta va hlula. A hi fambeni zvezvi’! Wa zvi tiva a ku hikuyini Kalebhi a nga wula lezvo? Hi lezvaku yena na Joxuwa va wa tsumba Jehovha. Kanilezvi a zvipiyawu lezvi zvin’wani zva 10 zvi te: ‘Ahihi! A vanhu va seniyani va lehile, va fana ni lava va nga pswalilwe hi vavasati ni tingilozi! Loku hi gamakana navo hi fana ni mabhandzala’.

A vaIzrayeli va no mbhela ntamu. Va no sangula ku ngurangura va xuxa cikungo vaku: ‘A hi hlawuleni murangeli mun’wani hi tlhela Gibhite. Hi nga yeni tikweni legiya hi nga dawa’. Joxuwa na Kalebhi vaku: ‘Mu nga tsikeni ku ingisa Jehovha. Mu nga chavi kambe. Jehovha i ta hi vhikela’.  Kanilezvi a vaIzrayeli va wa nga zvi lavi ku ingisa. Va zile va lava ni ku daya Joxuwa na Kalebhi!

Maku Jehovha i mahile yini? I no byela Mosi aku: ‘A vaIzrayeli ndzi va mahele zvilo zvo tala. Hambulezvo, a va se zvi lava ku ndzi ingisa. Hikwalaho, va ta tshama 40 wa malembe lomu ciwuleni va tlhela vafa kwalomu. A vana vabye na Joxuwa na Kalebhi hi vona va to ya hanya ka tiko legi ndzi va tsumbisileko’.