Andzhako ka loku a vaIzrayeli va tshamile cikhati co kari lomu ciwuleni, Kora na Dhatani na Abhiramu, ni van’wani va 250, va no vhukela Mosi na Aroni. Va va byela lezvi: ‘Hi karele hi n’wina vasa! Hikuyini wena Mosi u ti mahako hosi ya hina, Aroni a ti maha mupristi wa hombe? Jehovha i na hina hontlheni. A nga na wena na Aroni basi’. Lezvo a zvi mu tsakisangi Jehovha; i zvi wonile na vo tsika ku ingisa yena!

Mosi i no byela Kora ni lava va nga mu seketela aku: ‘A mandziko ngonani laha tabhernakelini, a zvibya zva n’wina zva ku oka hi zvona ndzilo na zvi hi ni libani. Jehovha i ta hi komba loyi a mu hlawulileko’.

Hi mandziko wa kona, Kora ni 250 wa vavanuna va noya tlhangana na Mosi laha tabhernakelini. Va noya hisa libani a ku khwatsi hi loku va hi vapristi. Jehovha i no byela Mosi na Aroni aku: ‘Ti hambaniseni na Kora ni vanhu vakwe’.

Hambu lezvi Kora a nga yile ka Mosi le tabhernakelini, Dhatani, na Abhiramu ni maxaka yabye a va vhumelangi ku famba.  Jehovha i no byela vaIzrayeli lezvaku va nga tshineli kusuhani ni matenda ya Kora na Dhatani na Abhiramu. A vaIzrayeli va no tekela ku suka. Dhatani, na Abhiramu ni maxaka yabye va no yima le handle ka matenda yabye. A misava yi no avanyeka hi citshuketi, yi va mita vontlhe vaku bhi! Lomu tabhernakelini, ku nota ndzilo hi le tilweni wu ta hisa Kora ni vavanuna vakwe va 250.

Jehovha i no gumesa a byela Mosi aku: ‘Teka nhonga ya murangeli mun’we ni mun’wani wa lixaka la Izrayeli, u tsala vito ga yena laha ka yona. Kanilezvi, laha ka nhonga ya lixaka la ka Levhi, tsala vito ga Aroni. Gumesa u ti veka lomu tabhernakelini. A nhonga ya loyi ndzi mu hlawulileko, yi ta huma zvitsangi’.

Ka siku gi nga landzela, Mosi i nota ni tinhonga tontlhe a ta komba varangeli. A nhonga ya Aroni yi wa hi ni zvitsangi, niku yi wa hi ni mihandzu yo buvha. Lezvo zvi wa komba lezvaku Jehovha i hlawulile Aroni kasi ava mupristi wa hombe.